Óðinn fékk silfrið í fyrsta sinn

Kadetten tapaði í dag 39-33 á heimavelli fyrir Kriens Luzern í þriðja leik úrslitaeinvígis liðanna. Óðinn var næstmarkahæstur í sínu liði með sex mörk úr átta skotum, þar af fjögur mörk úr sex vítum.

Kriens vann einvígið 3-0 og stöðvaði þar með sigurgöngu Kadetten sem hafði orðið svissneskur meistari fjögur tímabil í röð, þrjú síðustu ár með Óðin innanborðs.

Kadetten var 31-30 yfir þegar innan við níu mínútur voru eftir af leiknum í dag en þá skoraði Kriens átta mörk gegn einu frá Kadetten og komst í 38-32, og vann að lokum 39-33.