Sjáðu öll mörkin: Hrafn­hildur Ása og Sig­ríður í ham

Einn leikjanna var þó markalaus en það var botnbaráttuslagur Vals og Fram á Hlíðarenda. Framkonur náðu þar í sitt fyrsta stig en eru enn þremur stigum á eftir Val og stigi á eftir Þór/KA.

Breiðablik vann Þór/KA 3-1 á Akureyri og þar var hin 19 ára Hrafnhildur Ása Halldórsdóttir áfram í stuði en hún er komin með þrjú mörk á leiktíðinni. Hún fiskaði vítið sem fyrsta mark leiksins kom úr, skoraði annað markið og var svo einnig viðloðandi þriðja markið áður en Hulda Ósk Jónsdóttir náði að laga stöðuna í lokin.

FH varð fyrsta liðið til að vinna ÍBV í sumar og það með stæl því liðið fagnaði 3-0 sigri í Kaplakrika í gær. Birna Kristín Björnsdóttir skoraði fyrsta markið snemma leiks og þær Ída Marín Hermannsdóttir, úr víti, og Helena Errington bættu við mörkum í seinni hálfleik.

Þróttarinn Sigríður Theódóra Guðmundsdóttir skoraði svo tvö mörk gegn Víkingi, í 4-1 sigri, og er komin með fjögur mörk í síðustu þremur deildarleikjum auk þess að hafa komið inn á sem varamaður og skorað í bikarsigrinum gegn Breiðabliki á dögunum.

Nýliðar Grindavíkur/Njarðvíkur hafa byrjað leiktíðina af krafti en urðu að sætta sig við 1-1 jafntefli gegn Stjörnunni eftir jöfnunarmark Ingibjargar Lúcíu Ragnarsdóttur á 90. mínútu. Lily Farkas hafði komið heimakonum yfir á 10. mínútu.

Næsta umferð verður öll spiluð næsta mánudag, á öðrum í hvítasunnu.