Gísli Þor­geir út­skýrir fjar­veru sína: „Ber ekkert nema virðingu fyrir lands­liðinu“

Ísland mætir Egyptalandi í Kaíró í fyrri æfingarleik liðanna af tveimur í dag klukkan eitt en marga stóra pósta vantar í liðið. Þar með talið Gísla Þorgeir, Ómar Inga Magnússon og Elvar Örn Jónsson sem allir spila með Magdeburg í Þýskalandi.

Í fyrsta leik eftir landsleikjahléið mætir Magdeburg liði Flensburg í toppslag þýsku úrvalsdeildarinnar þar sem að sigur tryggir Magdeburg þýska meistaratitilinn. 

Það er svo um miðjan júní sem Magdeburg mætir nú ríkjandi Þýskalandsmeisturum Fuchse Berlin í undanúrslitum Meistaradeildar Evrópu. 

Mikilvægar vikur framundan hjá íslensku leikmönnum Magdeburgar sem vilja vera ferskir í lokatörn tímabilsins.

„Ég vanmet landsliðið ekki en þessir tveir leikir á móti Egyptalandi eru ekki eins mikilvægir og leikur um þýska meistaratitilinn,“ sagði Gísli Þorgeir í viðtali eftir stórsigur Magdeburgar um nýliðna helgi er hann gaf útskýringu á fjarveru sinni, Ómars Inga og Elvars Arnar í landsliðsverkefni Strákanna okkar.

„Auðvitað ber ég ekkert nema virðingu fyrir landsliðinu og þeirri vinnu sem fer þar fram. Engu að síður mun þetta hjálpa okkur aðeins.“

Magdeburg er með sjö stiga forskot á Flensburg á toppi þýsku úrvalsdeildarinnar þegar að fjórar umferðir eru eftir af deildinni og átta stig í pottinum.