Erlent

Maður varð fyrir flug­vél á flug­braut og lést

Tómas Arnar Þorláksson skrifar
Flugvél flugfélagsins Frontier á flugvellinum í Denver. Mynd úr safni.
Flugvél flugfélagsins Frontier á flugvellinum í Denver. Mynd úr safni. AP/David Zalubowski

Maður varð fyrir flugvél á flugbraut alþjóðaflugvallarins í Denver í Bandaríkjunum í gær þegar flugvélin ætlaði að taka á loft. Maðurinn lést samstundis þegar að atvikið átti sér stað seint í gærkvöldi.

Eldur kom upp í einum hreyfli vélarinnar við áreksturinn og var slökkvilið kallað á vettvang sem náði tökum á eldsvoðanum. Fréttastofa Breska ríkisútvarpsins greinir frá þessu.

Maðurinn sem lést hafði klifrað yfir grindverkið við flugbrautina og lést tveimur mínútum síðar þegar hann gekk þvert yfir flugbraut í veg fyrir flugvélina sem ók þar til að taka á loft. Maðurinn lést um klukkan ellefu í gærkvöld á staðartíma.

Í frétt ABC um málið kemur fram að maðurinn hafi að hluta sogist inn í hreyfil vélarinnar og þannig mætt endalokum sínum. Þar kemur einnig fram að tólf hafi slasast við áreksturinn. Þar af voru fimm færðir á slysadeild.

Allir 224 farþegar vélarinnar yfirgáfu vélina um uppblásanlegar neyðarrennibrautir vélarinnar. Í yfirlýsingu frá Frontier segir að flugfélagið sé harmi slegið vegna atviksins. 

„Við þurfum að stöðva á flugbrautinni. Við lentum á einhverjum. Það er eldur í hreyflinum,“ sagði flugmaður vélarinnar í samtali við flugumferðarstjórn. Flugvélin var komin á þó nokkurn hraða þegar maðurinn gekk í veg fyrir hana.




Fleiri fréttir

Sjá meira


×