Þrettán frá Gidsel en Bjarki og fé­lagar fögnuðu

Veszprém vann þýsku meistarana með eins marks mun, 35-34, og fer því með naumt forskot til Berlínar í næstu viku þegar seinni leikur liðanna fer fram. Sigurliðið í einvíginu kemst í fjögurra liða úrslitahelgina í Köln.

Bjarki Már Elísson var á leikskýrslu hjá Veszprém en ekki á meðal markaskorara að þessu sinni. Þeir Ivan Martinovic og Hugo Descat enduðu markahæstir hjá heimamönnum með átta mörk hvor. Maður leiksins var hins vegar Gidsel sem skoraði heil 13 mörk úr aðeins 17 tilraunum í leiknum.

Berlínarrefirnir voru lengst af yfir í leiknum og komust mest fimm mörkum yfir um miðjan seinni hálfleik, 26-21. Veszprém náði hins vegar að jafna í 28-28 og komst svo tveimur mörkum yfir þegar skammt var eftir, 35-33, en lokamarkið var gestanna sem þar með eru í nokkuð góðri stöðu fyrir heimaleik sinn.