Ný þjálfun í golfi: „Ég vildi að sjálf­sögðu ná meiri árangri“

Kaupverðið var sagt vel á sjötta milljarð en einn stofnenda Völku hafði áður starfað hjá Marel, starfaði þar líka um sinn eftir söluna en er í dag einn af stofnendum ELVA Golf.

ELVA Golf er að þróa hátæknibúnað sem kylfingar geta notað, án þess að þurfa sérstakan sérfræðing til að festa alls kyns merki og skynjara, til að mæla sveifluna með mikilli nákvæmni og hjhjálpaannig kylfingum að bæta sig hraðar.

„Valka var stofnað árið 2003 og sama ár eignaðist ég tvíbura. Golfið fór því til hliðar um tíma en eftir að Valka var selt fór ég á ný að spila meira,“ segir Helgi Hjálmarsson, stofnandi Völku og einn stofnenda ELVA Golf.

„Ég vildi að sjálfsögðu ná meiri árangri en fannst framþróunin ganga heldur hægt,“ segir Helgi og brosir.

Af því leiddi samtal á milli Helga og gamals vinar, golffélaga og golfkennara, Arnars Más Ólafssonar.

„Við Arnar byrjuðum að spila golf saman 11 ára,“ segir Helgi og bætir við að í þessu samtali þar sem hann kvartaði undan því hversu seinlega honum fannst árangurinn vera að skila sér með golfæfingum, segir hann við Arnar:

„Við hljótum að geta nýtt tæknina eitthvað betur fyrir þetta. Getum við ekki reynt að búa eitthvað til svo þjálfunin geti gengið hraðar fyrir sig?“

Innovation Week Iceland verður haldin í næstu viku, þar sem nýsköpun er til umræðu og kynnt með alls kyns viðburðum, fyrirlestrum, kynningum og fleiru frá morgni til kvölds dagana 27.–30. apríl, sjá dagskrá HÉR.

Í tilefni Innovation Week fjallar Atvinnulífið um nýsköpun í gær og í dag.

Að verða betri í golfi

ELVA Golf var stofnað í febrúar 2023. Stofnendur eru auk Helga: golfkennararnir Arnar Már Ólafsson og Grétar Eiríksson, Jaldert Rombouts tæknistjóri, Eyrún Arna Eyjólfsdóttir gervigreindarsérfræðingur og Dr. Rob Neal frumkvöðull og rannsakandi.

„Golfið er erfið íþrótt í eðli sínu. Enda gengur það út á að samhæfa margar hreyfingar,“ segir Helgi og bætir við:

„Fólki gengur því misvel í golfi og þótt fólk sé duglegt og einbeitt að æfa sig skilar það ekki alltaf miklum árangri“

Helgi og Arnar byrjuðu þó ekki á því að ræða hugmynd um búnað sem gæti hjálpað fólki að ná árangri. Heldur byrjuðu þeir á því að leita og skoða hvað væri til af hjálpartækjum á markaðinum.

„Í stuttu máli kom í ljós að til þess að fá almennilega mælingu eða greiningu á því hvernig líkaminn er að hreyfa sig í golfi þurfti sérfræðing eins og Rob Neal til að framkvæma ákveðnar mælingar,“ segir Helgi og bætir við:

„Þegar ELVA Golf varð til hafði Rob Neal þá þegar mælt hreyfingu golfara í um tuttugu ár með skynjaratækni, enda brautryðjandi á sínu sviði.“

Eitt leiddi af öðru og nú er svo komið að lausnin ELVA Golf er orðin að veruleika. Með ELVA Golf er líkaminn myndaður með nokkrum myndavélum í rauntíma, án þess að kylfingurinn sé með einhvern búnað á sér til að mæla sveifluna eða hreyfinguna.

ELVA Golf greinir hvernig kylfingurinn hreyfir sig og leiðbeinir síðan hvernig hægt er að bæta sig. Sem þýðir að ELVA Golf er að hjálpa bæði kylfingum og golfkennurum. Öllum sem vilja þjálfa sig í golfi til að verða betri.

„Búnaður ELVA Golf er nú þegar í notkun hjá Golfklúbbi Garðabæjar, í Golfklúbbi Mosfellsbæjar og í Golfhöllinni. Erlendis er ELVA Golf í notkun í Flórída og í Minnesota,“ segir Helgi og markmiðið er skýrt:

Við ætlum okkur að verða staðalbúnaður bestu kylfinga í heimi. Því það mun skila því að allir aðrir kylfingar munu vilja nota ELVA Golf.“

Einkaleyfi í heiminum 

Golfhermirinn var auðvitað bylting á sínum tíma, segir Helgi. Ekki síst á Íslandi þar sem golfið náði þá að breytast úr nokkurra mánaða sumarsporti yfir í íþrótt sem fólk getur stundað allan ársins hring.

Helgi segir golfherminn því skipta miklu máli þegar kemur að þjálfun og æfingu en Elva Golf er búnaður til viðbótar við herminn, því með ELVA Golf er verið að nýta gervigreindina til að mæla, greina og meta hreyfingar líkamans og leggja til umbætur og þjálfunarleiðir til að verða betri.

Verandi frumkvöðull sem áður hefur farið í gegnum sprotastig og upphaf nýsköpunar er gaman að taka spjallið við Helga um breytingar og þróun í áranna rás.

„Gervigreindin sem slík er til dæmis að auka á allan hraða. Þeir sem ekki nýta sér þessa tækni eru því líklegir til að sitja eftir í allri þróun,“ segir Helgi.

Sem segir umhverfi nýsköpunar á Íslandi líka einstaklega gott. Helgi nefnir þar bæði Tækniþróunarsjóð og háskólasamfélagið.

„Þetta umhverfi var til staðar þegar Valka var stofnað en hefur breyst og þróast mjög mikið síðan þá. Eitt af því sem er til dæmis mjög gott í dag er samstarfið á milli KLAK og Tækniþróunarsjóðs,“ nefnir Helgi sem dæmi.

ELVA Golf hefur fengið styrkinn Sproti hjá Tækniþróunarsjóði og nýtir sér einnig endurgreiðslur Rannís fyrir rannsóknar- og þróunarkostnað.

Klukkan 15 fimmtudaginn 30.apríl í Austurbæ verður einmitt einn viðburður á Innovation Week með ýmsum nýsköpunarfyrirtækjum á sviði íþrótta þar sem þessi mál verða án efa rædd. 

Með Hugverkastofunni gekk Elva Golf frá skráningu vörumerkis og umsóknum einkaleyfa, sem Helgi hefur mikið nýtt sér í gegnum tíðina.

„Ég hef eflaust sótt um allavega tíu einkaleyfi,“ útskýrir Helgi.

„Þegar fólk sækir um einkaleyfi er gott að byrja á því að sækja um eins víðfeðmt leyfi og hægt er. Þrengja þá frekar lýsinguna eins og þarf því það eitt og sér að fá einkaleyfi hefur svo mörg góð áhrif,“ segir Helgi og nefnir sem dæmi:

„Til dæmis hefur einkaleyfi fælingarmátt, það eru minni líkur á að einhver reyni að fara að gera það sama og þú.“

Eitthvað sem svo sannarlega getur skipt sköpum í heimi nýsköpunar.

Nú fæddist hugmyndin, ef svo má segja, sem hvatning til að gera þig betri í golfi. Er það að takast með ELVA Golf?

„Já já, engin spurning,“ segir Helgi og hlær.

„Þetta svona mjakast hjá mér þannig að ég er á réttri leið.“