Rekinn án skýringa og ætlar í mál

Gottfridsson var liðsfélagi Janusar Daða Smárasonar í vetur og hafði gert samning við félagið til þriggja ára.

Núna hefur hann verið rekinn, án útskýringa, og ætlar að leita réttar síns.

Tilkynning Pick Szeged um að samningi Gottfridsson hefði verið rift var afar stutt og varpaði ekki frekara ljósi á málið. Þar sagði þó að hann hefði spilað 31 leik í treyju félagsins og skorað 57 mörk, og var Svíanum þakkað fyrir sín störf.

Í yfirlýsingu sinni, sem sjá má hér að neðan, segir Gottfridsson forráðamenn Pick Szeged vera að brjóta harkalega bæði skrifaðar og óskrifaðar reglur handboltans.

„Þetta gerðu þeir líka þrátt fyrir að ég hafi barist af öllu hjarta fyrir liðið á hverri einustu æfingu og í hverjum leik. Ég klæddist treyju þessa söguríka félags af allra mestu hollustu og stolti.

Hérna vildi ég ljúka ferlinum, ég sá fyrir mér nánustu framtíð mína og fjölskyldunnar í þessum dásamlega bæ, ég hefði helgað félaginu síðustu ár ferilsins.

Vonbrigði mín verða ekki sett í orð. Ég hefði aldrei getað ímyndað mér að félag með þennan orðstír myndi fórna öllum siðferðisreglum íþróttanna, af ástæðum sem mér eru ekki kunnar,“ skrifaði Gottfridsson og kvaðst ætla að leita réttar síns svo að enginn handboltamaður myndi þurfa að upplifa það sama í Ungverjalandi í framtíðinni.