Margt sem þarf að laga

Íslenska liðið átti ekki sinn besta dag þegar það sótti færeyska landsliðið heim til Þórshafnar á miðvikudagskvöldið var. Færeyjar unnu fimm marka sigur en stelpurnar okkar náðu aldrei að gera almennilegan leik úr verkefninu.

„Þetta var bara ótrúlega svekkjandi. Við spiluðum ekki okkar leik, fylgdum ekki okkar kerfi og okkar gildum. Við erum búnar að skoða það og það þýðir ekki að dvelja of lengi við þennan leik,“ segir Elín Klara við Vísi og bætir við:

„Við skiluðum okkur ekki nægilega vel heim. Varnarlega vorum við að missa þær allt of mikið inn í gegnum miðjuna og á línunni. Það var alltof mikið pláss á milli okkar og við þurfum að vera þéttari. Vörn og hlaupin heim voru mjög stór faktor.“

Elín Klara hefur verið prímusmótor í sóknarleik Íslands síðustu misseri en komst ekki á blað í Færeyjum í vikunni. Það hefur ekki gerst í háa herrans tíð að hún skori ekki í landsleik, og það því eðlilega vonbrigði.

„Jú, klárlega. En þrátt fyrir að sóknin hafi ekki verið spes náum við að skora 30 mörk. Svona ef við tökum eitthvað jákvætt úr þessu,“ segir Elín Klara.

Allt annað verkefni bíður hins vegar á morgun, gegn Portúgal.

„Það er ólíkt færeyska liðinu og við byrjum strax í dag (í gær) að undirbúa okkur fyrir það. Við erum mjög spenntar og það er bara að ná fram brosinu aftur og næsti leikur. Við erum að fara í ótrúlega mikilvægan leik,“

„Þær eru ótrúlega sterkar líkamlega. Það er mjög mikilvægt að við þéttum pakkann varnarlega og náum upp þessari geðveiki og liðsheild sem við stöndum fyrir. Þá er allt opið í þessu,“ segir Elín Klara.

Leikurinn er úrslitaleikur um þriðja sæti riðsilsins sem veitir að líkindum sæti á EM. Tapist leikurinn er sá draumur úr sögunni. Það kemur því aðeins eitt til greina á morgun.

„Við erum virkilega spenntar að koma heim og spila fyrir framan okkar fólk. Það er það skemmtilegasta sem maður gerir.“

Viðtalið má sjá í spilaranum.