For­eldrarnir byrja daginn á því að dansa og dilla sér

Í kaffispjalli um helgar er rætt við fólk í ólíkum störfum. Við spyrjum alltaf um hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna oftast í kringum 6:00 en það er alfarið hundinum að þakka sem tekur hlutverk vekjaraklukku mjög alvarlega. Ég er þó farin að kunna vel að meta þetta, það er eitthvað gott við að ná smá forskoti á daginn áður en allt fer á fullt.“

Hvað er það fyrsta sem þú gerir á morgnana?

„Ég byrja daginn á að hleypa litla „dýragarðinum“ út, hundinum og kettinum og kveiki svo á kaffivélinni. Svo tekur við verkefnið að vekja strákana okkar tvo. Það kemur þeim alltaf jafn mikið á óvart að þeir þurfi að vakna á virkum dögum fyrir skóla, sem flestir foreldrar tengja líklega við.

Tónlist er svo það sem kveikir almennilega á deginum hjá okkur fjölskyldunni. Strákarnir okkar eru ekki alveg jafn hrifnir af því með hækkandi aldri að sjá foreldra sína dansandi svona snemma morguns í eldhúsinu, en að dansa inn í daginn setur oft besta taktinn fyrir daginn.“

Hversu mikið / lítið átti páskamálshátturinn þinn í ár við þig?

„Þeir fá byr sem bíða“ var málshátturinn í ár. Ég tengi vel við það, þó ég sé klárlega frekar hröð í mér og vil keyra hluti áfram þá hef ég lært með árunum hvað þolinmæði er mikill styrkleiki. Sérstaklega í stærri verkefnum þar sem hlutir þurfa tíma til að þróast og lokaútkoman verður sterkari fyrir vikið.“

Í hvaða verkefni ertu að vinna helst í þessa dagana?

„Ég er að vinna að nokkrum lykilverkefnum þessa dagana. Til dæmis áframhaldandi þróun og uppbyggingu á vörumerkinu Takk, nýju vildarkerfi Haga. Í því verkefni er markmiðið að skilja þarfir viðskiptavina og sníða þjónustu og vöruval enn betur að þeim og skila raunverulegu virði í daglegum innkaupum.

„Samhliða því vinn ég að vörumerkjamálum nýrrar rekstrareiningar, Haga miðla, þar sem við erum að þróa nýjar leiðir til miðlunar í verslun í gegnum smásölumiðlun, sem er einn hraðast vaxandi auglýsingamiðill í heiminum í dag. Það er sjaldan bara eitt verkefni í gangi og enginn dagur alveg eins sem er stór hluti af því sem gerir starfið svona skemmtilegt.

Persónulegra verkefni þessa dagana er svo að fara að koma mér aftur í hlaupagírinn fyrir sumarið. Sem betur fer var nýlega stofnaður hlaupahópur hjá Högum sem gerir það aðeins auðveldara.“

Hvernig skipuleggur þú þig í vinnu?

„Ég hef vanið mig á að nota sunnudaga sem „reset“ fara yfir vikuna fram undan, stilla fókus og forgangsraða. Það gerir það að verkum að ég byrja vikuna með skýrari stefnu í stað þess að elta daginn.

Í framhaldi af því forgangsraða ég deginum snemma, yfir fyrsta morgunbolla, áður en hann fer almennilega af stað. Þá næ ég að halda yfirsýn og ákveða hvað á að fá athygli hverju sinni, sem skiptir miklu þegar dagarnir fyllast hratt.

Ég grínast oft með það að nútíma markaðsmanneskja þurfi að vera með meistaragráðu í multitasking, en fyrir mér snýst þetta minna um að gera allt í einu og meira um að forgangsraða rétt og halda fókus.

Og svo er eitt sem er algjör leikbreytir, það að grípa hugmyndir þegar þær koma og skrifa þær strax niður. Bestu hugmyndirnar koma sjaldnast þegar maður situr kyrr við tölvuna, heldur frekar á hreyfingu eða á milli funda þannig að ég reyni alltaf að ná þeim niður áður en þær hverfa aftur.“

Hvenær ferðu að sofa á kvöldin?

„Alltof seint, ef ég á að vera hreinskilin. Ég á erfitt með að slökkva alveg á deginum. Það er alltaf eitthvað sem mig langar frekar að gera en að fara að sofa, hvort sem það eru heima stefnumót, góður lestur, smá skroll eða eitthvað að horfa á. Ég er líklega blanda af kvöld og morgun manneskju, sem er kannski ekki alveg besta samsetningin en virkar einhvern veginn.“