Krapaspýja lokar Vestfjarðavegi

„Já, hér á Vestfjarðavegi. Það fór smá spýja yfir veginn og lokar honum,“ segir Þorsteinn í samtali við fréttastofu.

Þorsteinn slapp í gegn en vegurinn er lokaður.

„Það vildi þannig til að það var ágætur maður þarna á góðum jeppa og hann stakk sér í gegnum þetta. Ég fór í kjölfarið. En Vegagerðin er eitthvað í kringum þetta.“

Þorsteinn er því á leið suður í þessum orðum skrifuðum. En Vestfjarðarvegurinn er lokaður í Dölum við Skriðuland.

Ekkert lát er á ofankomu og hvassviðri á landinu og eru lægðirnar hreinlega í biðröð eftir því að komast til Íslands og hrella landsmenn. Á miðvikudag er búist við átta til 18 metrum á sekúndu, hvassast Norðaustanlands. Á fimmtudag verður suðvestan átt með skúrum og slydduéljum og á föstudag er ákveðin austan- og norðaustanátt með rigningu eða slyddu einkum á austanverðum hluta landsins.