Allir verði að sjá æfingar Thelmu

Thelma komst af öryggi í átta manna úrslitin á gólfi með því að ná 4. sæti í undankeppninni og fá þar 12.366 stig. Hún var reyndar einnig nálægt því að komast í úrslit á slá en hafnaði þar í 11. sæti.

Í úrslitunum á gólfi í Egyptalandi í dag sýndi Thelma svo áfram hve frumlegar og frábærar æfingar hennar eru, og hafnaði í 6. sæti.

Alþjóðafimleikasambandið, FIG, birti æfingar Thelmu á samfélagsmiðlum sínum og sagði það einfaldlega skyldu að horfa á þær [e. must watch]. Æfingarnar má sjá hér að neðan.

„Sagði einhver frumlegt? Skapandi? Einstakt? Þetta atriði hefur þetta ALLT!“ skrifaði FIG með myndbandinu á Instagram.

Thelma endaði eins og fyrr segir í 6. sæti og hlaut hún 12.300 stig. Hin kínverska KE Qinqin vann til gullverðlauna og hlaut 12.966 stig. Hillary Heron frá Panama hlaut 12.933 stig og silfur, og hin spænska Laia Font hlaut 12.900 stig og fékk brons.

„Thelma átti frábæran dag og skilaði öllu sínu. Ég er stoltur og spenntur fyrir komandi tímum, Ísland er á uppleið,“ segir Þorgeir Ívarsson, landsliðsþjálfari kvenna, á heimasíðu Fimleikasambandsins.