Vaktin: Austanbylur annan í páskum

Fyrstu veðurviðvaranir tóku gildi klukkan 7 í morgun á Suðurlandi þar sem djúp lægð nálgaðist úr suðvestri. Viðvaranir náðu síðar til allra landshluta og var spáð austanvindi upp á 15-28 m/s með snörpum vindhviðum. Þá var eitthvað um snjókomu eða skafrenning með slæmu skyggni og versnandi færð. 

Upp úr hádegi voru viðvaranirnar á Suðurlandi færðar upp á appelsínugult og um klukkan 13 tóku gular viðvaranir gildi á höfuðborgarsvæðinu og síðan á Norðurlandi, Vesturlandi og Austurlandi. Faxaflói var færður upp á appelsínugult klukkan 14. Um miðnætti falla flestar viðvaranir úr gildi nema á Norðaustur- og Austurlandi þar sem þær falla úr gildi klukkan 3 í nótt.

Dagurinn var annasamur hjá björgunarsveitum sem þurfu meðal annars að losa fjölmörg ökutæki, manna lokunarpósta, bregðast við foktjóni og taka þátt í aðgerðum vegna neyðarboðs einkaflugvélar á Akureyri.

Um kvöldið gerðu þrumur og eldingar vart við sig á Suðurlandi og suðvesturhorninu. Þá var nokkuð um rafmagnsleysi á svæðinu sem hafði í sumum tilvikum áhrif á hitaveitu og stóriðju. Raforkukerfið var komið í jafnvægi síðar um kvöldið.  

Um tíuleytið var opnað fyrir umferð um Hellisheiði, Holtavörðuheiði og Þrengsli en víða eru enn í gildi lokanir og vegfarendur því hvattir til að fylgjast vel með færð. 

Áfram gætir áhrifa veðursins á morgun þar sem Icelandair hefur fellt niður morgunflug frá Bandaríkjunum og Kanada, auk þess sem Herjólfur hefur fellt niður fyrri ferð sína. 

Ef vaktin birtist ekki hér fyrir neðan er ráðlagt að endurhlaða síðunni.