Hokin af reynslu og vill stórt egg fyrir strákinn

Góa framleiðir hátt í hálfa milljón eggja fyrir páskana og höfðu lokið framleiðslu þegar ákveðið var að ræsa vélarnar á nýju til að framleiða egg fyrir starfsfólk Landspítalans. Alls þurfti að bæta við sex þúsund páskaeggjum.

Greint var frá því í vikunni að vegna niðurskurðar fengju starfsmenn Landspítalans engin páskaegg gefins þetta árið. Forráðamenn Góu ákváðu að grípa í taumana og gefa starfsfólkinu egg og í gær mætti Ragnar Freyr Ingvarsson, formaður læknafélags Reykjavíkur, og aðstoðaði við framleiðsluna.

„Okkur finnst náttúrulega ekki nógu gott að það sé ekki verið að gefa fólki páskaegg, framlínufólkinu á spítalanum. Það er fólkið sem er að vinna vinnuna og hugsa um okkur þannig að við verðum að gefa þeim páskaeggin í ár,“ sagði Helgi Már Gíslason, framkvæmdastjóri Góu og barnabarn hins eina sanna Helga í Góu.

Hann segir skemmtilega stemmningu skapast hjá fyrirtækinu þegar framleiðsla eggjana fer á fullt um áramótin. Síðustu eggin fara í verslanir á morgun og þá tekur við skemmtileg hefð starfsmanna.

„Við stöndum vaktina til miðnættis í kvöld að steypa þessi egg og svo eftir hádegið á morgun þá fær allt starfsfólkið að koma og búa til sín eigin páskaegg og skreyta og koma með nýjar hugmyndir fyrir næsta ár,“ sagði Helgi í viðtali í gær.

Starfsmenn voru í óða önn að koma sælgæti fyrir í síðustu eggjunum og skreyta.

„Þetta er fyrir spítalann, við erum að byrja núna og ég held að við klárum í dag,“ segir Choosri sem unnið hefur hjá Góu í 25 ár. Hún er ekki í neinum vafa hvert sé hennar uppáhaldsegg. 

„Ég vil fá stórt egg,“ segir hún hlæjandi. 

„Fyrir strákinn minn,“ bætir hún svo við.

Rúsínan í pylsuendanum eru svo páskaungarnir sem þurfa að fara á sinn stað. Fréttamaður fékk að spreyta sig í skreytingum eggjanna eins og sjá má í myndbandinu hér fyrir neðan en ólíklegt verður þó að teljast að honum verði boðin vinna við slíkt á næstunni.