Elvar með stór­leik í flottum sigri

Ribe-Esbjerg fagnaði þá fimm marka sigri á Fredericia, 31-26, í næstsíðustu umferðinni fyrir úrslitakeppnina.

Elvar skoraði tólf mörk úr aðeins fimmtán skotum og var langmarkahæstur í sínu liði. Hann var í sannkölluðu landsliðsformi í kvöld.

Þetta var annar sigurleikur Ribe-Esbjerg í röð og sá þriðji af síðustu fjórum leikjum en liðið vann aðeins fimm af fyrstu 21 leikjum sínum á þessu tímabili.

Elvar skoraði sjö af fyrstu þrettán mörkum liðsins og var þá einnig með stoðsendingu sem þýddi að hann kom að átta af fyrstu þrettán mörkum Ribe í leiknum. Ribe komst á sama tíma í 13-10.

Ribe-Esbjerg var þremur mörkum yfir í hálfleik, 14-11, og hélt tökum á leiknum út leikinn.

Ribe-Esbjerg er nú tveimur stigum á eftir Fredericia sem fyrir umferðina sat í síðasta sætinu sem gefur sæti í úrslitakeppninni.