Ó­sáttur við sóknina í fyrri hálf­leik: „Fannst við of hægir og staðir“

Íslendingar töpuðu öðru sinni fyrir Svíum í dag, 27-30. Varnarleikur Íslands var heilt yfir þéttari í dag en í leiknum á fimmtudaginn.

„Sérstaklega í fyrri hálfleik. Ég held að bæði lið hafi kannski að einhverju leyti verið óánægð með varnarleikinn í fyrri leiknum. Það var svolítill æfingaleikjabragur á því en það var annar taktur í því í dag. Við lögðum klárlega áherslu á það að vera betri og þéttari til baka og vorum það sérstaklega í fyrri hálfleik,“ sagði Snorri í samtali við Vísi í leikslok.

„Við byrjuðum seinni hálfleikinn ekki alveg nægilega vel í vörn og ég hefði svo sem viljað að sóknarleikurinn myndi fylgjast meira með. Við fórum líka með of mikið af færum og hann [Mikael] Appelgren varði full mikið fyrir minn smekk í báðum leikjunum.“

En fannst Snorra íslenska liðið fá þau færi sem það vildi í sókninni?

„Mér fannst við ekki nægilega góðir í sókninni í fyrri hálfleik. Mér fannst við of hægir og staðir og það vantaði herslumuninn þar, kannski svolítið eins og í varnarleiknum í fyrri leiknum. Ég hefði viljað sjá okkur betri þar. En við sköpuðum okkur samt alveg stöður sem ég var ekkert óánægður með og við höfum bara þurft að nýta þær betur,“ sagði Snorri.

„Í báðum leikjunum náum við ekki upp kannski takti bæði varnar- og sóknarlega á sama tíma og það er svekkelsi.“

Snorri prófaði nokkra leikmenn vinstra megin fyrir utan í sókninni, meðal annars Hauk Þrastarson, Reyni Þór Stefánsson og Þorstein Leó Gunnarsson.

„Það áttu allir sín augnablik. Ég tek bara næstu viku í að gera upp þessa leiki og vikuna í heild sinni. Það er fullt sem ég sá í þessari viku og fullt sem við tökum með okkur og getum byggt á.“

Snorri fer ekkert í grafgötur með að hann vildi fá allavega einn sigur í þessu verkefni.

„Ég vil bara vinna. Það er svekkjandi að tapa leikjum. En ég er ekkert ósáttur með vikuna í heild sinni. Ég fékk fullt af svörum og margt sem ég bara vildi sjá og fékk alveg en maður vill alltaf vinna,“ sagði landsliðsþjálfarinn að lokum.