„Getum ekki alltaf spilað á sama liðinu“

„Það er svekkjandi að hafa ekki unnið einn leik á heimavelli. Við fengum þetta tækifæri, tvo leiki heima og vera fyrir framan fólkið okkar. Það svíður svolítið mikið,“ sagði Viktor í samtali við Vísi eftir leikinn í Kaplakrika.

Minna var skorað í leiknum í dag en í leiknum á fimmtudaginn og varnirnar öflugri.

„Eins og við töluðum um eftir leikinn vantaði þetta auka; smá geðveiki og að dekka einn og hálfan mann í staðinn fyrir bara að taka og hugsa um sinn mann. Við gerðum það aðeins betur í dag en fannst mér engu að síður hafa aðeins vantað upp á,“ sagði Viktor. 

„Við erum að skipta mikið og margir nýir og óreyndir menn sem hafa kannski ekki spilað mikið saman. Það vantar svona þessa tengingu á milli manna sem kemur með tímanum að spila saman.“

Sóknarleikur Íslands var á köflum stirður og kollegi Viktors í sænska markinu, Mikael Appelgren, reyndist íslensku sóknarmönnunum erfiður ljár í þúfu. Viktor segir að höktið í sókninni megi ef til vill skrifa á að allir leikmenn íslenska liðsins séu ekki vanir að spila saman en það verði að prófa nýja hluti.

„Þetta eru leikirnir til að prófa eitthvað nýtt. Við þurfum að gera það. Það sást á EM að þegar menn voru orðnir þreyttir vantaði kannski eitthvað aðeins öðruvísi til að brjóta upp leikinn og það er bara eitthvað sem við þurfum að vinna í og tekur bara tíma. Við erum með Ómar [Inga Magnússon] og Gísla [Þorgeir Kristjánsson] sem spila ákveðna týpu af handbolta sem er kannski erfitt fyrir menn sem eru ekki æfa með þeim á hverjum degi að aðlagast á 2-3 dögum. Það er bara eitthvað sem við þurfum að vinna í og það tekur bara tíma,“ sagði markvörðurinn.

En hvernig er tilfinningin eftir þessa tvo leiki, þá fyrstu eftir Evrópumótið.

„Bara flott. Alltaf leiðinlegt að tapa en við erum að þróa liðið. Við erum að skipta um menn, við erum að koma með nýja hluti og það er það sem við þurfum að gera fyrir framtíðarárangur,“ sagði Viktor. 

„Við getum ekki alltaf spilað á sama liðinu. Maður verður að þróa sig og það er það sem við erum að gera. Þetta eru leikirnir í það en það er alltaf erfitt að tapa.“