„Verðum að ná sigri í þessu verkefni“

Ingvi Þór Sæmundsson skrifar 19. mars 2026 22:07

Orri Freyr Þorkelsson vill ólmur vinna leikinn gegn Svíþjóð á laugardaginn kemur. vísir/anton

Orri Freyr Þorkelsson skoraði sex mörk þegar Ísland laut í lægra haldi fyrir Svíþjóð, 33-35, í fyrri vináttulandsleik þjóðanna af tveimur. Hann naut þess að spila á Íslandi en var svekktur með tapið.

Það er ekki á hverjum degi sem íslenska karlalandsliðið í handbolta spilar vináttuleiki hér á landi. Kjaftfullt var að Hlíðarenda í kvöld.

„Mér finnst það hrikalega gaman. Þetta er ekki Höllin og það er mjög gaman að spila þar en mér fannst geggjað að koma hingað og spila hérna. Þetta minnti kannski smá á svona þegar ég spilaði síðast á Íslandi þegar við vorum að spila í úrslitakeppni,“ sagði Orri við Vísi eftir leikinn í kvöld.

„Ég held að það sé svolítið skemmtilegt fyrir okkur strákana að upplifa að spila í fullu húsi sem er ekki Laugardalshöllin. Það er aðeins öðruvísi og mér fannst það hrikalega skemmtilegt.“

Mörkunum rigndi inn í fyrri hálfleik þar sem bæði lið skoruðu nítján mörk.

„Við vorum að fá of mikið af mörkum á okkur. Mér fannst við vera svona full seinir í gang og við hefðum getað verið betri varnarlega. Þeir voru kannski að skora full mikið af auðveldum mörkum í fyrri hálfleik. Svo varð þetta aðeins þéttara og í seinni og ekki eins mörg mörk. En já, það er kannski svona mín sýn á það,“ sagði Orri.

Íslenska liðið skoraði 33 mörk í leiknum í kvöld þrátt fyrir góða frammistöðu sænsku markvarðanna, sérstaklega Mikaels Appelgren.

„Mér fannst við heilt yfir góðir sóknarlega og kannski smá bras á einhverjum tímapunktum í seinni hálfleik. En eins og í fyrri fannst mér flæðið gott. Við fengum mörg mismunandi mörk og okkur gekk vel að skora. Ég veit ekki hvað Appelgren varði mikið en hann leit allavega út fyrir að verja svolítið í seinni hálfleiknum,“ sagði Orri.

En hverju á hann von í seinni leik Íslands og Svíþjóðar í Kaplakrika á laugardaginn?

„Bara því sama. Við mætum bara aftur og ég hugsa að þetta verði bara nokkuð svipaður leikur. Ég er ósáttur með að við töpum þessum leik. Við eigum að mæta á laugardaginn og sækja sigur. Það er mikilvægt. Ég ætti að gefa okkur mikið,“ sagði Orri.

„Við verðum að ná sigri í þessu verkefni. En ég hugsa að þetta verði bara nokkurn veginn eins. Það verður bara gaman að mæta í Krikann og spila þar. Það kemur vonandi fullt af fólki eins og í dag.“

Landslið karla í handbolta

Mest lesið

Fleiri fréttir