Réttu tæki­færin opnuðust þegar sumarstarfsmaður var ráðinn sem sendill

Og opnar þar um leið fyrir sannleika sem svo margir kannast við:

Að allt gangi nú út á gervigreind og bestun.

Að tilfinningin um að „verða að gera eitthvað“ fari vaxandi.

Að vera svo sannarlega til í ný og spennandi tækifæri EN….

....hafa líka sjóast það mikið á síðustu árum að vita að margt af því sem atvinnulífið hefur prófað og reynt er ekkert endilega málið þegar á hólminn er komið.

Á Íslandi er hjarðhegðunin svo mikil og auðvitað fórum við í að gera spjallmenni á okkar síðu eins og allir aðrir. Sem lengi vel gerði lítið annað en að auka á álagið á okkar fólk í þjónustuverinu; sem nú þurfti að afgreiða erindi í síma, í tölvupósti eða samfélagsmiðlum og nú fyrir spjallmennið.“

Þetta sem betur fer. Því þegar rétta tækifærið gafst, hófst loksins rétta vegferðin með gervigreindinni.

Í gær og í dag fjallar Atvinnulífið um gervigreindina tengdri þeim erindum sem fram komu á ráðstefnunni Uppbrot 2026, sem SVÞ stóð fyrir í síðustu viku. Þar hélt Ingþór erindi um gervigreindina í þjónustu- og verkstæðisrekstri BL.

Sumarstarfsmaðurinn góði

Ingþór lýsir stöðunni í dag mjög svipað og margir aðrir stjórnendur:

„Þú ert með þessa tilfinningu um að þú verðir að gera eitthvað, annars sé hætta á að maður sitji eftir og verði út undan.“

Spurningin er samt: 

Hvað á að gera? Hvernig er þessi tækni að nýtast? Því þær leiðbeiningar eru einfaldlega hvergi til.

„Gervigreindin er að nýtast okkur flestum eins og gott gúggl og auðvitað veit ég að það er fullt af aðilum tilbúnir til að selja fyrirtækjum ráðgjöf og þjónustu um hvernig best er að nýta gervigreindina og allt það. Staðreyndin er þó sú að það er enginn raunverulegur vegvísir til. 

Og þú veist ekki hvað þú átt að biðja um fyrr en þú sérð það í raun.“

Ingþór segir fyrirtæki þó þurfa að vera vakandi yfir því þegar rétta tækifærið gefst.

Sem í tilfelli BL var þegar Dorian mætti á svæðið!

„Við vorum að ráða í sumarafleysingar eins og við gerum á hverju ári þegar Ásdís deildarstjóri tekur viðtal við einn mjög efnilegan ungan mann sem er í tölvunarfræði í Háskóla Íslands með áherslu á gervigreind. 

Í atvinnuviðtalinu spyr hann Ásdísi um spjallmennið og gervigreindina og hvernig við séum að nota gögnin okkar,“ segir Ingþór og vísar þar til samtals á milli Ásdísar Jónu Sigurjónsdóttur og Dorian Konrad Michalski vorið 2024.

„Ásdís áttaði sig strax á að þarna væri einn efnilegur á ferðinni og lét mig vita af því,“ segir Ingþór brosandi og augljóslega hæstánægður með ráðninguna.

Fljótlega eftir að Dorian byrjaði að vinna hófust samræður á milli hans og Ingþórs um hvernig væri hægt að nýta gervigreindina til að betrumbæta umrædda spjallmennið og fleiri þætti í þjónustunni.

„Dorian benti á hvaða gögn við værum með innanhúss sem þyrfti að tengja þannig að gervigreindin nýtti sér þau í svörum og upplýsingagjöf, þannig að spjallmennið væri frekar að létta á álagi en að auka við það og væri líka með getuna til þess að geta svarað erindum hratt og vel,“ segir Ingþór en bætir við:

„Það er þó ekki nóg að vera með gögn og tengja þau saman. Því þar er að mörgu að huga líka. Til dæmis þurfum við að passa mjög vel upp á að gervigreindin komist ekki í ákveðin gögn tengd viðskiptavinum okkar. Spjallmenni getur því ekki nýtt neinar upplýsingar úr til dæmis viðskiptamannasögu eða séð kennitölur og símanúmer fólks.“

Tryggur og Tóti

Það sem fljótlega kom í ljós var að með því að tengja saman rétt gögn, fór gervigreindin að nýtast vel í svörum spjallmennisins og fljótlega var hægt að bæta við.

„Þá fór bottinn að rúlla!“ segir á glæru Ingþórs frá erindinu góða á Uppbroti, þar sem segir jafnframt um afraksturinn:

Færri símtöl, færri tölvupóstar, skjótari svörun fyrir viðskiptavini og tími fyrir starfsfólk til að sinna erfiðari málum.

En það er ekki allt. Því síðan þetta var hefur BL haldið áfram að nýta gervigreindina.

„Eins og flest fyrirtæki þekkja felst mikil vinna og kostnaður í því að halda úti vefverslun, enda þarf alltaf að vera að uppfæra hana. Til dæmis með tilliti til vörubirgða hjá okkur, birgjum, senda reikninga á milli okkar og söluaðila eða okkar og viðskiptavina og svo framvegis,“ segir Ingþór en bætir við:

Með gervigreindinni breyttum við vefversluninni í spjallverslun, sem þýðir að nú sér gervigreindin um allt sem snýr að versluninni án þess að mannshöndin þurfi að koma að.“

BL fór líka í að bæta vel í upplýsingaþjónustu um verð á þjónustu til neytenda.

„Neytendalögin eru þannig að fólk á rétt á að fá að vita hvað þjónusta kostar áður en hún er framkvæmd og í hverju sú þjónusta felst eða hvað vörur fyrir viðgerð kosta. Þetta geta viðskiptavinir nú fengið svör um mjög hratt og auðveldlega, enda er það gervigreind sem tekur þetta saman.“

Spjallmennið Tryggur sér um upplýsingagjöf til neytenda en fljótlega bættist Tóti líka við; félaginn sem sér um starfsmenn BL.

„Fyrir gervigreindina tengdum við saman öll innanhúsgögn þannig að vinnuleiðbeiningar, starfsmannahandbók, tækniupplýsingar, tækniaðstoð, þýðingar og svo framvegis eru allt samtengt og umhverfið orðið mjög notendavænt og auðvelt fyrir alla starfsmenn,“ segir Ingþór sem í erindinu á Uppbroti sagði líka frá því að auðvitað komi stundum upp vandamál og einhver mjög skondin atvik.

Til dæmis þegar gervigreindin var að þýða frá litháísku yfir á íslensku að skipt hefði verið um slöngu fyrir rúðuvökva. 

En þýðingin varð:

„Setti upp nýjan þvaglegg.“

Stóra ljósaperan

Ingþór ákvað strax að erindið hans á Uppbroti myndi segja söguna eins og hún hefur verið í raunveruleikanum; þar sem stjórnendur eru oft í vandræðum með að finna réttu leiðina.

„Að sitja á fyrirlestri sem segir manni hvernig gervigreindin getur skipulagt frí fyrir fjölskylduna er ekkert endilega að nýtast manni. Möguleikarnir eru óþrjótandi en það að ræða gervigreindina svona fræðilega er eins og að kasta fólki fyrir borð í mitt Atlantshafið og segja; syntu í land! Þegar í raun enginn sér til lands eða veit yfirhöfuð í hvaða átt landið er, sem synda á til,“ segir Ingþór og undirstrikar þar um leið hversu margt er enn í mótun hvað varðar gervigreindina.

„Á Íslandi eru fyrirtæki búin að brenna sig svolítið á því að hlaupa af stað á eftir nýjungum og svo er ekki nægjanleg geta eða kunnátta innan fyrirtækisins til að innleiða nýjungarnar. Þetta er þó oft erfið staða að vera í. Því við erum örmarkaður sem fólk ætlast til að við höfum sama bolmagn og getu og í margra milljóna samfélagi, ekki síst í þessum tæknimálum.“

Stóra málið sé því að velja rétta tækifærið og réttu leiðina.

„Ég myndi líka segja: Velja bara eitt í einu. Klára það verkefni og fara síðan af stað með það næsta.“

Ingþór segir líka lykilatriði að fá fólk í lið með sér.

„Gervigreindin gerir það sem við segjum henni að gera. Sem þýðir að það er lykilatriði að fá fólk í lið með sér í verkefnið; því það er fólkið sem í raun þróar og prófar tæknina þannig að úr verður nógu góð þjónusta.“

Af Dorian er það síðan að frétta að auðvitað er Ingþór búinn að tryggja honum fastráðningu.

Sem hann lét gesti á Uppbroti svo sannarlega vita af!

Ingþór segist spenntur fyrir framhaldinu og meira að segja stundum svolítið óþolinmóður. Hann geri sér þó grein fyrir því að það skipti líka máli að hafa varann á tækninni.

„Ég sé fyrir mér öðruvísi framtíð og spennandi. Sem gengur út á að hagræða en ekki endilega að fækka störfum, ná þannig að gera hlutina betur og staðlaðri en áður og ná þannig betri árangri. Nýta gervigreindina sem þetta frábæra tól sem hún er og þó þurfum við að hafa smá varann á þessari tækni. Ekki að fara of geyst,“ segir Ingþór en tekur dæmi um hvernig gervigreindin getur hjálpað okkur að verða enn betri en nokkru sinni fyrr:

„Þekkingarkrafan er alltaf að aukast og í okkar tilfelli störfum við undir mjög ströngum kröfum og stöðlum okkar birgja erlendis. Gervigreindin hjálpar mjög mikið til við þetta og á líka mjög auðvelt með að taka inn mikið magn af upplýsingum og vinna úr þeim hratt og örugglega,“ segir Ingþór og nefnir sem dæmi handbókina góðu sem fylgir öllum bílum en enginn les.

„Fyrir mér leiddi rétta tækifærið okkar til þess að ég fór loksins að sjá til lands með það hvernig við sem fyrirtæki gætum nýtt okkur þessa tækni til góðs. 

Að átta okkur á því hvernig við getum bætt þjónustuna okkar með því að tengja saman gögn og láta gervigreindina um að vinna úr því, var eins og að kviknað hefði á stórri 40 watta peru.

Sem á endanum breyttist í flóðlýsingu, svo mörg spennandi tækifæri sé ég fram undan.“