Stöðvuðu stút með naglamottu

Umræddur ökumaður hafði mælst á yfir 170 kílómetra hraða og neitaði að sinna stöðvunarmerkjum lögreglu. Hann var á endanum stöðvaður með naglamottu við Hveragerði.

Þá var hann handtekinn en hann er grunaður um ölvunarakstur og að hafa stofnað öðrum í hættu í umferðinni.

Þetta er meðal þess sem kemur fram í færslu lögreglunnar á Facebook um verkefni helgarinnar á Suðurlandi. Fjögur umferðarslys voru skráð í kerfi lögreglunnar um helgina en tvö þeirra urðu við Skíðaskálabrekku og ollu miklum töfum.

Þá fóru tvær rútur út af veginum á sama svæði en þar urðu engin slys á fólki. Loka þurfti bæði Hellisheiði og Þingvallavegi vegna þeirra atvika.

Seint á sunnudagskvöld varð bílslys við Lómagnúp. Þá valt húsbíll sem í voru sex manns. Enginn mun hafa slasast alvarlega.

Tvö önnur slys voru tilkynnt til lögreglu um helgina. Ferðamaður slasaðist við Seljalandsfoss og svo sprakk flugeldur í andlit einstaklings.