Sverja af sér sam­særis­kenningar um klónaðan Carrey

Gregory Caulier, skipuleggjandi hátíðarinnar, sendi frá sér yfirlýsingu til dægurmálablaðsins Variety þar sem hann segir sögusagnirnar rangar og að Carrey hafi sýnt viðburðinum mikinn áhuga frá því í fyrrasumar. 

„Hann var í marga mánuði að æfa þakkarræðuna sína, sem hann flutti á frönsku. Auk þess bað hann mig um að aðstoða sig með framburð á vissum orðum,“ er haft eftir Caulier.

Þá bendir hann á að tólf nánir fjölskyldumeðlimir og vinir hafi fylgt leikaranum til Parísar á hátíðina. Sjálfur hefur Carrey ekki tjáð sig opinberlega um samsæriskenningarnar. 

Tilefni sögusagnanna þykir vera breytt útlit leikarans, sem hefur haldið sig til hlés undanfarin ár. Förðunarfræðingurinn Alexis Stone, sem farðað hefur margar af helstu stjörnum Hollywood og sérhæfir sig í umbreytandi förðun, veitti orðrómunum byr undir báða vængi í gær þegar hann birti nærmyndir af Carrey á hátíðinni auk myndar af hárkollu og grímu sem líkist andliti Carrey á Instagram og skrifaði við myndina „Alexis Stone sem Jim Carrey í París.“

Síðan þá hefur Marleah Leslie, útgefandi Carrey til margra ára, áréttað við bandaríska slúðurmiðilinn TMZ að vitaskuld hafi Carrey sjálfur verið við hátíðina í París og tekið á móti heiðursverðlaununum.

Hollywood-stjörnur á borð við Megan Fox og Katy Perry hafa síðan brugðist við færslu Stone. 

„Ég má ekki við meiri kvíða núna, ég verð að fá að vita hvort þetta sé alvöru,“ segir sú fyrrnefnda í athugasemd. 

Málið hefur sömuleiðis vakið athygli hér á landi en undir færslu um málið í lokaða Facebook-hópnum Beauty Tips er að finna hátt í áttatíu athugasemdir. 

Í þaulæfðri þakkarræðu sinni á frönsku á fimmtudag minntist Carrey ýmissa brautryðjenda í franskri kvikmyndagerð og rakti tengsl sín við Frakkland en þaðan á hann forföður sem fluttist til Kanada, hvar Carrey fæddist.