Reynir með tólf marka kvöld í Evrópudeildinni

Reynir Þór Stefánsson var með tólf mörk fyrir þýska liðið Melsungen og Þorsteinn Leó Gunnarsson skoraði sex mörk fyrir portúgalska félagið Porto. Báðir fóru þeir mikinn á upphafskafla leikjanna.

Porto vann tveggja marka útisigur á spænska félaginu Fraikin BM. Granollersm, 29-27, eftir að hafa verið með forystuna allan tímann.

Þorsteinn Leó skoraði fjögur af níu fyrstu mörkum Porto sem voru komnir 9-3 yfir í upphafi leiks en þá var íslenska skyttan búin að skora fleiri mörk en spænska liðið. Porto var fjórum mörkum yfir í hálfleik, 12-8, og Þorsteinn var með fimm mörk úr sjö skotum í fyrri hálfleiknum.

Porto vann þarna sinn annan sigur í riðlinum en liðið náði Elverum að stigum í öðru sætinu.

Melsungen byrjaði vel á móti HC Vardar 1961 í Norður-Makedóníu en varð á endanum að sætta sig við fjögurra marka tap, 37-33. Reynir Þór var langatkvæðamestur á vellinum með tólf mörk úr nítján skotum en hann skoraði ekkert þeirra af vítalínunni og gaf einnig fimm stoðsendingar.

Reynir Þór Stefánsson byrjaði sinn leik líka virkilega vel og var kominn með fimm af fyrstu þrettán mörkum Melsungen.

Melsungen komst mest sex mörkum yfir í fyrri hálfleiknum, 15-9, en leiddi með einu marki í leikhléi, 19-18. Reynir Þór var með sex mörk í fyrri hálfleiknum.

Vardar-menn voru sterkari í seinni hálfleiknum og unnu góðan sigur.

Melsungen hafði unnið þrjá fyrstu leiki sína í riðlinum en þetta var bara annar sigur Vardar-liðsins.