„Day of fun“ fól ekki í sér á­fengi hjá Jóni Erik

Jón Erik virtist örlítið slompaður í myndbandinu sem hann birti á TikTok eftir þennan gleðidag með vinum sínum. Þeir voru þá sestir á veitingastað, kvöldið áður en Jón keppti á ÓL og náði besta árangri Íslendings í tvo áratugi.

„Heil og sæl kæra þjóð. Dagurinn í dag er búinn að vera geggjaður… Strákarnir eru mættir og við tókum day of fun í dag. Ég held að við séum bara klárir í morgundaginn“ sagði Jón Erik í myndbandinu.

Umræða fór af stað um það hvort Jón Erik hefði verið með áfengi við hönd þetta kvöld. Meðal annars var þetta mál rætt í hlaðvarpinu Steve Dagskrá.

„Hann var ekki í sódavatni þennan dag. Augun alveg fljótandi og sindrandi. Þetta er Paul Gascoigne svigsins, the bad boy of slalom“ sögðu þeir skellihlæjandi og tóku síðan fram að þeir væru ánægðir með þetta framtak. 

Jón Erik birti annað myndband í gær, eftir heimkomuna til Íslands, þar sem hann sagðist ánægður með sína frammistöðu og áréttaði að áfengi hefði ekki verið við hönd þetta umrædda kvöld.

„Í ljósi umræðunnar um þetta skemmtilega day of fun myndband þarna hjá mér fyrir stórsvigið… Menn halda að ég hafi farið aðeins of greitt í gleðina en ég vildi bara minnast á það að ég hef aldrei drukkið áfengi, tekið í vörina eða einu sinni drukkið orkudrykki. En bara öll umræða er góð umræða“ sagði Jón Erik og hafði gaman að.

„En að öllu gríni slepptu þá vil ég bara þakka kærlega fyrir mig. Við erum rétt að byrja“ sagði þessi efnilegi skíðakappi að lokum.