Viktor Gísli fagnaði sigri og sæti í átta liða úr­slitunum

Barcelona mætti til Ungverjalands og vann öruggan átta marka útisigur á SC Pick Szeged, 35-27.

Spænska liðið vissi að sigur myndi tryggja þeim sæti í átta liða úrslitum keppninnar þangað sem tvö efstu lið riðilsins komast en næstu fjögur lið berjast síðan um hin tvö sætin í umspilsleikjum.

Það var lítil spenna í leiknum í kvöld. Börsungar voru komnir ellefu mörkum yfir í hálfleik, 21-10.

Það var reyndar enginn Íslendingaslagur í kvöld því Janus Daði Smárason spilaði ekki með Szeged í þessum leik.

Viktor Gísli fékk líka lítið sem ekkert að spila en reyndi við eitt vítakast. Danski markvörðurinn Emil Nielsen varði ellefu skot.

Sigvaldi Björn Guðjónsson og félagar í Kolstad töpuðu með tólf marka mun á útivelli á móti nýkrýndum dönsku bikarmeisturum í Álaborg, 36-24. Sigvaldi skoraði fjögur mörk úr fjórum skotum í fyrri hálfleik en eftir hann munaði aðeins þremur mörkum á liðunum, 17-14 fyrir Álaborg.

Sigvaldi bætti við tveimur mörkum í seinni hálfleik og var markahæstur í sínu liði með sex mörk úr sex skotum. Simon Jeppsson skoraði líka sex mörk. Sigurjón Guðmundsson var varamarkvörður en Benedikt Gunnar Óskarsson var ekki með.

Kolstad er í sjöunda sæti með fjögur stig og fjórum stigum frá sæti í umspilinu. Álaborg komst í toppsætið með þessum sigri.