Jón Erik náði 25. sætinu með frá­bærri seinni ferð

Jón Erik varð í þrítugasta sæti í fyrri ferðinni og fékk því að skíða með úrvalshópnum. Jón Erik fór fyrstur af stað í seinni ferðinni og náði frábærri ferð.

Jón kláraði fyrri ferðina af öryggi á 1:04,51 mín en þá síðari glæsilega á 1:01,12 mín. og var því um svaka bætingu hjá honum milli ferða.

Jón Erik vann sig líka upp um fimm sæti og endaði því í 25. sæti. Aðeinn einn annar skíðamaður vann sig upp um fleiri sæti í seinni ferðinni.

Þetta er besti árangur Íslendings í svigi karla síðan Björgvin Björgvinsson náði 22. sæti á leikunum í Torino fyrir tuttugu árum.

Íslendingur hafði ekki komist í mark í svigi karla á síðustu tveimur Ólympíuleikum.

Svisslendingurinn Loic Meillard tryggði sér Ólympíugullið eftir að Norðmaðurinn Atle Lie McGrath gerði grátleg mistök í seinni ferðinni eftir að hafa náð bestu fyrri ferðinni.

Austurríkismaðurinn Fabio Gstrein fékk silfur og Henruik Kristoffersen fékk brons.