Finni á Krókinn og Þór skiptir um Kana

Stólarnir hafa skráð í sínar raðir finnskan landsliðsmann sem heitir Daniel Dolenc. Samkvæmt upplýsingum Vísis kemur hann í staðinn fyrir hinn serbneska Ivan Gavrilovic sem Tindastóll hefur nú sagt upp. Skagamenn mun hafa reynt að fá Gavriolovic en óljóst er hvort það tókst.

Dolenc er 32 ára og 204 sentímetra miðherji. Hann var síðast á mála hjá Siroki í Bosníu en hefur einnig leikið í Rúmeníu, Litháen, Frakklandi og Austurríki, sem og heima fyrir í Finnlandi.

Dolenc gæti mögulega spilað með Tindastóli gegn KR annað kvöld, í undanúrslitum VÍS-bikarsins.

Þórsarar, sem eru í næstneðsta sæti, hafa einnig gert mikla breytingu á sínu liði og skipt bandaríska leikmanninum Jacoby Ross út fyrir bakvörðinn Dachon Burke.

Burke hefur spilað nokkuð víða í Evrópu eftir að hann útskrifaðist frá Nebraska háskólanum og spilaði hann síðast í desember í næstefstu deild í Ísrael. Hann er hávaxinn bakvörður sem hefur skorað mikið í gegnum sinn feril en er líka þekktur fyrir kæfandi varnarleik, að því er segir í tilkynningu Þórsara.