Vondar fréttir úr her­búðum Arsenal sem skoðar markaðinn

Það er David Ornstein hjá The Athletic sem greinir frá þessu í kvöld og segir hann forráðamenn vera að skoða leikmannamarkaðinn í leit að mögulegum staðgengli Merino en félagsskiptaglugginn lokar á morgun. 

Merino var ekki með Arsenal í 4-0 útisigri liðsins gegn Leeds United í ensku úrvalsdeildinni í gær og sagði Mikel Arteta, knattspyrnustjóri Arsenal, að fjarvera Merino væri vegna meiðsla. 

Spánverjinn hefur oft á tíðum reynst drjúgur fyrir Arsenal frá því að hann gekk í raðir félagsins frá Real Sociedad fyrir tímabilið 2024. 

Alls hefur Merino spilað 77 leiki fyrir Arsenal, þrjátíu og þrír þeirra hafa komið á yfirstandandi tímabili. 

Arsenal er sem stendur á toppi ensku úrvalsdeildarinnar með sex stiga forskot á Manchester City eftir leiki helgarinnar. Þá er liðið komið áfram í 16-liða úrslit Meistaradeildarinnar og er enn með í enska bikarnum sem og enska deildarbikarnum.