Svona er staðan: Strákarnir okkar þurfa að treysta á sænskt eða króatískt tap

Til þess að eiga möguleika á undanúrslitum þurfa strákarnir okkar að vinna Slóveníu á morgun, það er algjör grunnforsenda, annars er sénsinn farinn.

Sömuleiðis þarf Ísland að treysta á að annað hvort Svíþjóð eða Króatía tapi öðrum af sínum tveimur síðustu leikjum.

Króatía spilar við Slóveníu klukkan fimm í dag og Ungverjaland á morgun.

Einfaldasta leiðin fyrir Ísland væri því að Slóvenía vinni þann leik og Ísland vinni síðan Slóveníu á morgun.

Ef Króatía vinnur Slóveníu eru enn þrír leikir eftir sem gætu gefið Íslandi tækifæri. Það er að Króatía tapi gegn Ungverjalandi á morgun, eða að Svíþjóð tapi öðrum sinna leikja.

Ef Króatía vinnur báða sína leiki þarf Ísland að treysta á að Svíþjóð tapi, annað hvort gegn Ungverjalandi í kvöld eða Sviss á morgun.

Ef Svíþjóð og Króatía vinna báða sína leiki fara þau áfram í undanúrslit og skilja Ísland eftir, þó Ísland vinni Slóveníu á morgun.