Töl­fræðin á móti Pól­landi: Gísli með ellefu stoð­sendingar

Íslenska liðið byrjaði ekki leikinn alltof vel en gaf í um miðjan fyrri hálfleikinn og keyrði síðan yfir pólska liðið í seinni hálfleiknum. Flott innkoma manna eins og Hauks Þrastarsonar og Elliða Snæs Viðarssonar var líka mjög ánægjuleg en þeir voru með tíu mörk saman úr aðeins tólf skotum.

Gísli Þorgeir Kristjánsson gaf fjórar stoðsendingar í fyrstu sex mörkum íslenska liðsins og var allt í öllu í sókninni þrátt fyrir að skora kannski bara tvö mörk. Gísli endaði með alls ellefu stoðsendingar í leiknum og las pólsku vörnina eins og opna bók.

Haukur Þrastarson kom miklu fyrr inn í leikinn en í fyrsta leiknum og var líka að skila góðum hlutum þegar íslenska liðið var að komast yfir. Þetta var mjög góður leikur hjá Hauki og ofan á allt í sókninni stal hann tveimur boltum með eftirminnilegum hætti.

Fyrirliðinn Ómar Ingi Magnússon var valinn maður leiksins en var skiljanlega hissa á því. Ómar átti ekki sinn besta leik, fór með fjórar sóknir snemma leiks og gerði þá fleiri mistök en allan fyrsta leikinn. Hann nýtti samt vítin sín og var markahæstur í fyrri hálfleiknum.

Dauðafærin voru líka að fara forgörðum framan af leik og markvörður Pólverja gerði sig líklegan til að hrökkva í stuð. Frábær byrjun á seinni hálfleiknum sá hins vegar til þess að það varð aldrei að neinu áhyggjuefni. Sóknin gekk eins og smurð vél og liðið var að fá framlag úr öllum áttum. Það sést vel á því að fjórir leikmenn skora á bilinu fimm til sex mörk.

Vísir fylgist vel með tölfræði íslenska liðsins á mótinu og hefur nú tekið saman þá leikmenn sem sköruðu fram úr í tölunum í þessum fyrsta leik Íslands á mótinu.

Hér fyrir neðan má sjá toppa íslenska liðsins í tölfræðinni.