Ætlar að búa til gleðikokteil á skrif­stofu HSÍ

Valur Páll Eiríksson leit við á skrifstofunni hjá Fimleikasambandinu til að tala um handbolta.

„Það eru breytingar hér í Laugardalnum. Handknattleikssambandið hefur leitað að nýjum framkvæmdastjóra um hríð og hann er nú fundinn. Hún flytur sig um eina hæð hér í húsinu. Sólveig Jónsdóttir hefur verið hjá Fimleikasambandinu í um tólf ár en hlakkar nú til að takast á við nýja áskorun,“ sagði Valur Páll Eiríksson.

„Handboltinn er náttúrulega svolítið þjóðaríþróttin okkar og það elska allir janúar. Þannig að ég hugsaði bara að ég hefði margt fram að færa sem ég hef lært núna undanfarin ár í mínu starfi. Og það er mikil ástríða á skrifstofu HSÍ, þannig að saman held ég að þetta verði bara einhver svona gleðikokteill,“ sagði Sólveig Jónsdóttir en hverjar eru einmitt helstu áskoranirnar í þessu nýja starfi?

„Ég held að það séu bara alls staðar, heilt yfir allar íþróttir, hvert sem við horfum, hjá sambandinu, sérsamböndunum, eða félögunum eða hvar sem við erum. Þetta náttúrulega kostar allt peninga og það vantar peninga inn í hreyfinguna. Við erum að tryggja það að börn á Íslandi geti stundað íþróttir, óháð efnahag. Það er bara stórt mál fyrir okkur sem samfélag. Við hljótum að vilja búa til gott samfélag fyrir börnin okkar,“ sagði Sólveig.

Fjárhagur HSÍ hefur verið mikið til umræðu að undanförnu. Taprekstur upp á 120 milljónir undanfarin tvö ár gerir til að mynda að verkum að skera þarf niður í starfsumhverfi landsliðanna. Sólveig segist aftur á móti fremur vera spennt heldur en stressuð að takast á við þá áskorun.

„Það er gaman að takast á við verkefni og það er gaman að finna góðar lausnir. Ég einhvern veginn trúi því að ef fólk vinnur saman, þá sé hægt að finna farsælar lausnir sem að væri líka bara svolítið gaman að vera partur af. Þetta er bara verkefni niður til að leysa og það er bara skemmtilegt,“ sagði Sólveig.

Fleira kemur fram í viðtalinu við Sólveigu sem má sjá í heild að neðan.