Sarkozy laus úr fangelsi

Skömmu eftir að honum var sleppt lausum úr La Santé-fangelsinu sást hann koma á heimili sitt í vesturhluta Parísar. Hinum sjötuga Sarkozy er óheimilt að yfirgefa franskt landsvæði og eiga í samskiptum við annað lykilfólk málsins á borð við vitni og aðra sem voru ákærðir. Gert er ráð fyrir að áfrýjunarmeðferð fari fram síðar og þá mögulega næsta vor.

Eftir sakfellingu Sarkozy þann 25. september síðastliðinn varð hann fyrsti fyrrverandi nútímaþjóðhöfðingi Frakklands til að verða settur bak við lás og slá. Hann neitar sök en var fangelsaður 21. október á meðan hann beið áfrýjunar málsins. Hann sóttist strax eftir því að verða sleppt fyrr úr haldi og féllst áfrýjunardómstóll á þá beiðni í dag.

Hafi verið mjög erfið lífsreynsla

Við réttarhöld í dag hélt Sarkozy því fram að hann hafi ekki farið á svig við lög þegar kom að fjármögnun kosningabaráttunnar og uppfyllt allar lagalegar kröfur.

„Ég hafði aldrei ímyndað mér að ég myndi upplifa fangelsi 70 ára gamall,“ sagði hann og bætti við að reynslan hafi verið mjög erfið.

Á sama tíma vottaði Sarkozy starfsfólki fangelsisins virðingu sína og sagði það hafa hjálpað honum í gegnum „þessa martröð.“ Eiginkona Sarkozy, ofurfyrirsætan og tónlistarkonan Carla Bruni-Sarkozy, og tveir synir hans voru viðstaddir réttarhöldin í dómshúsinu í París.

Jafnframt sagði forsetinn fyrrverandi að hann hefði aldrei sóst eftir fjármunum frá Moammar Gaddafi, leiðtoga Líbíu. „Ég mun aldrei viðurkenna eitthvað sem ég gerði ekki,“ sagði hann.

Frönsk lög kveða á um að almenna reglan sé sú að sakborningar fái lausn á meðan áfrýjun stendur. Á sama tíma sé varðhaldi beitt ef sakborningar eru taldir hættulegir, líklegir til að flýja til annars lands, eða í þeim tilgangi að vernda sönnunargögn eða koma í veg fyrir að vitni verði beitt þrýstingi.

Fréttin er í vinnslu og verður uppfærð.