Arnar og Bjarki unnu golfmót

Sindri Sverrisson skrifar 24. ágúst 2025 12:15

Arnar og Bjarki Gunnlaugssynir fylgdust lengi að í fótboltanum en hafa svo fetað ólíka braut innan íþróttarinnar. Sýn Sport

Þó að tvíburabræðurnir Arnar og Bjarki Gunnlaugssynir séu þekktari fyrir afrek sín tengd fótbolta þá kunna þeir greinilega líka að vinna vel saman í golfi.

Arnar og Bjarki voru á meðal keppenda í Gull Styrktarmóti Golfklúbbs Kiðjabergs, þar sem keppt var eftir Texas Scramble fyrirkomulagi, og fögnuðu sigri eftir hnífjafna baráttu.

Alls tóku 74 lið þátt í keppninni en tvíburarnir urðu efstir eftir að hafa leikið á 65 höggum nettó, eða 12 höggum undir pari og fengið 48 punkta.

Reyndar lék lið Homo Erectus, sem var skipað Agli Kára Þórðarsyni úr GR og Ægi Þorsteinssyni úr GG, einnig á 48 punktum en Arnar og Bjarki léku betur á seinni níu holunum og hlutu efsta sætið.

Það er góðs viti fyrir íslenska landsliðið að Arnar sé á sigurbraut því brátt stýrir hann íslenska A-landsliðinu í fótbolta í sinni fyrstu undankeppni, eftir að hafa tekið við liðinu í byrjun þessa árs.

Arnar mun í þessari viku tilkynna landsliðshópinn sem mætir Aserbaísjan á Laugardalsvelli 5. september, og Frakklandi ytra 9. september, í fyrstu leikjunum í undankeppni HM 2026.

Þeir Arnar og Bjarki geta svo heimsótt Kiðjabergsvöll aftur því í verðlaun fyrir sigurinn fengu þeire hring fyrir tvo á vellinum auk gistingar í lúxusherbergi á Hótel Vesturlandi, með morgunverði og aðgangi að spa hótelsins.

Golf A&B