Ætlaði í höfuð­stöðvar NFL

Tamura hélt því einnig fram í bréfinu að hann hefði hlotið heilaskemmdir við að spila amerískan fótbolta fyrir um tveimur áratugum og fór fram á að heili hans yrði rannsakaður.

Eric Adams, borgarstjóri New York, sagði í morgun að eftir að Tamura skaut fjóra til bana í anddyri skrifstofubyggingar, sem hýsir meðal annars höfuðstöðvar NFL, ætlaði hann sér að fara í þær höfuðstöðvar en fór í rangar lyftur í byggingunni, samkvæmt AP fréttaveitunni.

Byggingin hýsir einnig höfuðstöðvar fjárfestingarfyrirtækisins Blackstone, sem er eitt stærsta sinnar tegundar í heiminum, en einn af starfsmönnum þess lést í árásinni.

Sjá einnig: Fjórir látnir eftir skot­á­rás á Manhattan

Eins og áður segir létust fjórir í skotárásinni, auk Tamura. Sá fimmti særðist alvarlega og var fluttur á sjúkrahús, þar sem hann er sagður í stöðugu ásigkomulagi. Sá er talinn starfsmaður NFL, samkvæmt CNN.

Öryggismyndavélar sýna manninn leggja BMW fyrir utan bygginguna, klukkan hálf sjö að staðartíma í gærkvöldi, og ganga inn í húsið haldandi á hálf sjálfvirkum riffli af gerðinni M4. Hann skaut lögregluþjón til bana í anddyrinu og konu.

Því næst fór hann að lyftum þar sem hann skaut öryggisvörð og annan mann. Þá elti hann konu um borð í lyftu, en leyfði henni að lifa, og fór upp á 33 hæð, þar sem hann skaut einn til bana og svipti sig svo lífi.

Lögregluþjónninn sem féll í árásinni var Didarul Islam. Hann var 36 ára gamall innflytjandi frá Bangladesh sem hafði verið í lögreglunni í þrjú og hálft ár. Hann var tveggja barna faðir en eiginkona hans er ólétt af þriðja barni þeirra.