Úr kjallaranum hjá mömmu yfir á stóra sviðið

„Við erum búnir að setja saman lagalista með bestu lögum heims. Þau eru bæði íslensk og erlend og svo snýst þetta um að blanda þeim saman og búa til gott flæði,“ segir Gústi fullur tilhlökkunar.

Draumur sem rættist

„Það er algjör draumur að fá að spila á stóra sviðinu á Þjóðhátíð. 

Fréttirnar gerðu mömmu svo sannarlega stolta. Ég á nokkur óskalög í settinu en lagið sem ég barðist mest fyrir er Hringdu í mig með Friðriki Dór,“ 

segir Arnór Snær sem kom nýr inn í hlaðvarpið í vetur.

Efni úr hlaðvarpinu hefur vakið mikla athygli á samfélagsmiðlum en í þáttunum ræða vinirnir allt milli himins og jarðar.

Búnir að hringja út alla greiða

Það er óalgengt að þrír einstaklingar sem ekki eru starfandi tónlistarmenn stígi saman á stóra sviðið í Herjólfsdal en strákarnir láta loddaralíðan ekki taka yfir. 

„Ég er viss um að margir sem renna yfir dagskrána hafi ekki hugmynd um það sem við ætlum að bjóða upp á. En þetta er ekki beint flókið. Við ætlum að spila frábær lög og halda fólkinu í stuði,“ segir Sigurður.

Gústi segir vinina ekki verða eina. 

„Það er fyndið að við séum að fara úr hlaðvarpsstúdíóinu í kjallaranum hjá mömmu yfir á stóra sviðið í Herjólfsdal og við erum fyrst og fremst þakklátir fyrir þetta einstaka tækifæri. 

Við erum búnir að hringja út alla greiða sem við áttum inni og fáum fullt af leynigestum til að taka lagið í settinu. Þetta verður veisla.“