Skoraði yfir sex hundruð mörk á tíma­bilinu

Gidsel missti reyndar af sigri í Meistaradeildinni eftir hetjulega framgöngu Gísla Þorgeirs Kristjánssonar og Ómars Inga Magnússonar og félaga með Magdeburg.

Gidsel vann hins vegar þýsku deildina í fyrsta sinn á ferlinum, varð Ólympíumeistari með Dönum í ágúst og heimsmeistari með Dönum í byrjun febrúar.

Gidsel varð bæði markahæstur á Ólympíuleikunum í París með 62 mörk sem og á HM í Króatíu, Danmörku og Noregi með 74 mörk. Hann hefur orðið markahæstur á síðustu fjórum stórmótum handboltans.

Hann varð einnig markahæsti leikmaður Meistaradeildarinnar með 187 mörk og sá næstmarkahæsti í þýsku úrvalsdeildinni með 275 mörk.

Samtals skoraði Gidsel 615 mörk í 71 keppnisleik á tímabilinu með Füchse og danska landsliðinu sem eru ótrúlegar tölur.

Það gera 8,7 mörk í leik á þessum rétt rúmu tíu mánuðum. Þetta er hann að gera án þess að taka vítaköst sinna liða.