Jón Daði skrifar undir hjá Sel­fossi

Jón Daði var kynntur til leiks á blaðamannafundi sem fer fram þessa stundina á veitingastað í miðbæ Selfoss.

Jón Daði greindi sjálfur frá því fyrir tveimur vikum að hann myndi snúa aftur heim til Íslands, eftir rúman áratug í atvinnumennsku erlendis. Hann var þá helst orðaður við Víking en síðasta sumar þegar hann var samningslaus var Jón orðaður við fleiri félög eins og KR, Breiðablik og Stjörnuna.

Alltaf hefur heimafélag hans Selfoss þó verið inni í myndinni og sú varð niðurstaðan að lokum. 

Ljóst er að hann mun reynast mikill og góður liðsauki fyrir Selfoss, sem er í fallbaráttu í Lengjudeildinni eftir að hafa komist upp í fyrra.

Jón Daði lauk sínum atvinnumannaferli erlendis með liði Burton Albion sem hann spilaði með síðasta hálfa árið í þriðju efstu deild Englands.

Jón Daði lék áður með Wrexham, Bolton, Millwall, Reading og Wolves á Englandi, eftir að hafa spilað með Kaiserslautern í Þýskalandi og Viking í Noregi en hann hóf meistaraflokksferil sinn heima á Selfossi.

Jón Daði er 33 ára gamall, á að baki 64 landsleiki fyrir Ísland og var hluti af hópnum sem fór á EM 2016 og HM 2018, en spilaði síðast landsleik árið 2022.

Nánar verður rætt við Jón Daða um heimkomuna í Sportpakka Sýnar að loknum kvöldfréttum.

Fréttin hefur verið uppfærð með myndum af blaðamannafundinum.