Forsetabikarinn rann Ís­landi úr greipum

Strákarnir okkur komust í úrslitaleikinn með öruggum 32-38 sigri gegn heimamönnum Póllands en lið Serbíu reyndist of stór biti. Leikurinn var í beinni útsendingu hér að neðan.

Leikurinn í dag var að mestu mjög spennandi og staðan í hálfleik jöfn, 18-18, þó að Ísland væri nálægt því að skora úr lokasókn sinni og taka með sér forystu inn í búningsklefa.

Serbarnir komu svo sterkari inn í seinni hálfleikinn og komust fljótt sex mörkum yfir, 26-20. Íslensku strákarnir gáfust hins vegar ekki upp og minnkuðu muninn í eitt mark, 29-28 og svo aftur 30-29, en tókst ekki að jafna metin og aftur náðu Serbarnir forskoti sem þeir létu ekki af hendi. Niðurstaðan því 18. sæti.

Sigurður Snær Sigurjónsson var markahæstur Íslands í dag með sjö mörk, Elmar Erlingsson skoraði sex mörk og Skarphéðinn Ívar Einarsson fimm.

Strákarnir byrjuðu mótið á tapi gegn Rúmenum í riðlakeppninni, gerðu svo svekkjandi jafntefli við Færeyjar eftir að hafa leitt nánast allan leikinn, unnu síðan Norður-Makedóníu en komust ekki upp úr riðlinum.

Þess í stað fór Ísland í neðri milliriðillinn, sem vannst með yfirburðum eftir leiki gegn Mexíkó og Marokkó. Ísland vann svo Pólland og mætti því Serbíu í dag í úrslitaleiknum um Forsetabikarinn.