Bætir í úr­komu í kvöld

Á vef Veðurstofunnar segir að í kvöld komi úrkomusvæði frá lægðinni inn á sunnanvert landið og heldur til norðurs. Mun þá bæta víða í úrkomu.

Hiti verður yfirleitt á bilinu sjö til fimmtán stig þar sem mildast verður austantil.

„Á morgun er áfram útlit fyrir fremur hægan vind og víða skýjað með köflum og úrkomulítið, en annað kvöld gengur í suðaustan 5-10 m/s vestast á landinu með dálítilli vætu,“ segir í hugleiðingum veðurfræðings.

Veðurhorfur á landinu næstu daga

Á föstudag: Vestlæg eða breytileg átt, 3-8 m/s og dálitlar skúrir á víð og dreif. Hiti 7 til 16 stig, hlýjast suðaustantil. Suðaustan 5-10 vestast á landinu um kvöldið.

Á laugardag (sumarsólstöður): Austlæg átt 5-10, en 10-15 með suðurströndinni. Rigning með köflum á sunnanverðu landinu, en yfirleitt þurrt annars staðar. Hiti 10 til 17 stig, hlýjast á Norðurlandi.

Á sunnudag: Norðaustan 8-13 norðantil, en hægari syðra. Dálítil rigning eða súld, en úrkomulítið vestanlands. Hiti frá 7 stigum við norðausturströndina, upp í 16 stig suðvestanlands.

Á mánudag og þriðjudag: Austlæg eða breytileg átt, skýjað og víða dálítil væta með köflum. Hiti 7 til 14 stig, svalast við austurströndina.

Á miðvikudag: Útlit fyrir vaxandi austanátt með rigningu, en úrkomulítið fyrir norðan. Hiti breytist lítið.