Funduðu á eyju um kaup Arsenal á Gyökeres

Samkvæmt Record hljómaði fyrsta boð Arsenal upp á 55 milljónir evra auk 10 milljóna evra í aukagreiðslu. Síðar hafði miðillinn þó eftir heimildamanni innan Sporting að í raun væri ekki um tilboð að ræða heldur fyrstu uppástungu, ef svo má segja, frá Arsenal. Ekkert formlegt tilboð hafi verið lagt fram að svo stöddu. 

Miðillinn bendir á að ljóst sé að Sporting muni fara fram á hærri upphæð enda sagði forseti félagsins, Frederico Varandas, það opinberlega í viðtali að Sporting myndi fara fram á meira en 60 + 10 milljónir evra. 

Það er upphæð sem að umboðsmaður Gyökeres er sagður hafa talið að heiðursmannasamkomulag ríkti um að yrði nóg til að kaupa Svíann í sumar en Varandas blés á það og sagðist eingöngu hafa lofað því að fara ekki fram á allar 100 milljónirnar sem losa myndu Gyökeres samkvæmt klásúlu í samningi hans.

„Mikið talað og mest ósatt“

Portúgalskir miðlar hafa lýst því þannig að nú hafi myndast gjá á milli Gyökeres og Varandas, og að Svíinn telji sig svikinn.

„Það er mikið talað í augnablikinu og mest af því er ósatt. Ég mun tala þegar rétti tímapunkturinn kemur,“ skrifaði Gyökeres hins vegar í Instastory hjá sér.

Eins og fyrr segir fullyrðir Record að Bernardo Palmeiro, yfirmaður fótboltamála hjá Sporting, og Andrea Berta kollegi hans hjá Arsenal, ásamt lögfræðingi, hafi hist í gær á Menorca til að ræða um Gyökeres. Viðræður félaganna gætu því verið rétt að hefjast.

Samkvæmt Record hefur Sporting komið þeim skilaboðum til félaga sem vilja Gyökeres að hann kosti 80 milljónir evra.

Gyökeres varð tvöfaldur meistari með Sporting í Portúgal á nýafstaðinni leiktíð og markakóngur annað árið í röð, með 39 mörk.