Ó­veðrinu slotar en á­fram hætta á skriðu­föllum

Síðasta hvassviðrisviðvöruninni fellur úr gildi á Vesturlandi nú eftir hádegi en þá taka við viðvaranir á Norðurlandi vestra og eystra þar sem varað er við vatnavöxtum og samfara því aukinni hættu á flóðum og skriðuföllum. Björn Sævar Einarsson veðurfræðingur segir úrkomumagnið á niðurleið en að enn sé hætta fyrir norðan.

„Þetta eru tvenns konar viðvaranir. Fyrst er talsverð eða mikil rigning. Nú er talsverð rigning fram til miðnættis en síðan verður minni rigning en hún hjálpar til að viðhalda ákveðinni hættu í sambandi við skriðuföll og flóð,“ segir hann.

Björgunarsveitir landsins hafa haft í nógu að snúast síðustu daga en Jón Þór Víglundsson, upplýsingafulltrúi Landsbjargar, segir þeim ekki hafa borist nein útköll í dag. Úrkoman sé að mestu orðin að rigningu í stað snjókomu.

Tilkynnt var um grjóthrun á Siglufjarðarvegi og litla skriðu í Neskaupstað í gærkvöld en engan sakaði.