Sel­foss­kirkju­garður að fyllast

Erindi frá sóknarnefnd um stöðu kirkjugarðsins á Selfossi var til umfjöllunar á síðasta fundi bæjarráðs þar sem áhyggjum var lýst af því að kirkjugarðurinn væri að fyllast og að nauðsynlegt væri að huga að næstu skrefum.

Bæjarráð tók undir erindið um mikilvægi þess að finna nýja framtíðarstaðsetningu fyrir kirkjugarð í Selfosssókn og var bæjarstjóra falið að funda með sóknarnefnd.

Í erindi kom fram að málið hafi nýlega verið rætt á sóknarnefndarfundi Selfosskirkju og sagði að síðasti hluti kirkjugarðsins væri langt kominn og að ekki væru nema fimm til sex ár þar til að full nýting yrði staðreynd.

„Á undanförnum árum hafa bæjaryfirvöld komið með tillögur um nýja staðsetningu á kirkjugarði, fyrst var það Mógili fyrir neðan Arnberg, sem hætt var við. Síðan kom tillaga um land við Árbæjarveg, vestan ár, sem sóknarnefnd hafnaði vegna fjarlægðar.

Sóknarnefnd telur mikilvægt að val á staðsetningu og möguleikum til langrar framtíðar skipta máli. Er því allur undirbúningur nauðsynlegur í tíma og gott samráð skemmdi ekki framgang málsins,“ segir í erindinu.

Í bréfi Björns Inga Gíslasonar, formanns sóknarnefndar, að það megi aldrei gerast að ekki verði hægt að sinna svona þjónustu þegar fram líða stundir.