Indiana Pacers í úr­slit í fyrsta sinn síðan árið 2000

Annað árið í röð lenti New York á vegg gegn Indiana. Síðast var það strax í fyrstu umferð úrslitakeppninnar en nú mættust liðin í úrslitum Austursins. Á meðan bensínið virtist einfaldlega búið hjá annars skemmtilegu liði Knicks þá var nóg eftir á tankinum hjá Indiana sem hafa heldur betur komið á óvart í úrslitakeppninni til þessa.

Fyrri hálfleikur í var nokkuð jafn en alltaf var Pacers skrefi á undan, staðan í hálfleik 58-54. Frábær byrjun á síðari hálfleik þýddi að New York hefði þurft enn eina endurkomuna til að tryggja sér oddaleik. Sú endurkoma kom aldrei og vann Pacers leikinn með 17 stiga mun, lokatölur 125-108.

Pascal Siakam var stigahæstur í liði Indiana með 31 stig ásamt því að taka fimm fráköst og gefa þrjár stoðsendingar. Tyrese Haliburton skoraði 21 stig, gaf 13 stoðsendingar og tók sex fráköst. Obi Toppin skoraði 18 stig og tók sex fráköst á meðan Andrew Nembhard skoraði 14 stig, gaf átta stoðsendingar og tók þrjú fráköst.

Í liði Knicks var OG Anunoby stigahæstur með 24 stig ásamt því að taka fimm fráköst og gefa þrjár stoðsendingar. Karl-Anthony Towns skoraði 22 stig, tók 14 fráköst og gaf tvær stoðsendingar. Jalen Brunson skoraði svo 19 stig, gaf sjö stoðsendingar og tók tvö fráköst.

Indiana mætir OKC í úrslitum og hefst úrslitaserían föstudaginn kemur, þann 6. júní.