Svein­dís til fé­lags í eigu stór­stjarna

Sveindís skrifaði undir samning við félagið sem gildir til sumarsins 2027. Hún kemur frítt til Angel City frá Wolfsburg í Þýskalandi þar sem samningur hennar rann út.

Angel City er staðsett í Los Angeles í Kaliforníu og á meðal eigenda félagsins eru stórstjörnur á borð við Natalie Portman, Miu Hamm, Abby Wambach, Evu Longoria og fleiri.

Liðið situr í 7. sæti af 14 liðum bandarísku deildarinnar, með 14 stig eftir níu leiki.

„Ég er svo spennt að vera að ganga til liðs við Angel City,“ segir Sveindís á heimasíðu félagsins þar sem tekið er fram að hún geti byrjað að spila um leið og leikheimild hennar gangi í gegn. Hún muni þar með fylla í eitt af þeim hólfum sem hvert félag í deildinni hefur fyrir erlenda leikmenn.

„Ég get ekki beðið eftir því að kynnast liðsfélögum mínum sem eru allar svo hæfileikaríkar. Það mun bæta leik minn að æfa og spila með svona mögnuðum leikmönnum, og einnig að vera með þessu þjálfarateymi. Ég vil vera hluti af einhverju stóru sem mun breyta knattspyrnu kvenna og þess vegna ákvað ég að semja við Angel City. Ég vil líka vinna titla og ég veit að það er markmið Angel City,“ sagði Sveindís og lofaði stuðningsmönnum félagsins að leggja allt í sölurnar.

Himinlifandi með að fá Sveindísi

„Við erum í skýjunum með að geta tekið á móti Sveindísi hjá Angel City,“ sagði Mark Parsons, yfirmaður íþróttamála hjá félaginu.

„Þetta eru lykilkaup fyrir okkur því hún er kraftmikill sóknarmaður sem hefur ítrekað haft áhrif í stórleikjum í Meistaradeild Evrópu og með landsliði. Sveindís er með mikilvæga hæfleika bæði með og án boltans og mun efla sóknarmannahóp okkar auk þess að koma með ótrúlegt vinnuhugarfar og hungur í sigur. Hún er enn 23 ára og við teljum Sveindísi geta haft mikil áhrif strax en einnig haldið áfram að þróast og þroskast hjá félaginu í mörg ár,“ sagði Parsons.

Sveindís, sem verður 24 ára í næsta mánuði, hóf ferilinn með Keflavík en lék einnig eitt ár með Breiðabliki áður en Wolfsburg tryggði sér krafta hennar í lok árs 2020. Hún var að láni hjá Kristianstad í Svíþjóð í eitt ár en hefur síðan spilað fyrir Wolfsburg, þó minna en hún hefði viljað. Hún lék alls fjórar leiktíðir fyrir Wolfsburg og skoraði 22 mörk og átti 16 stoðsendingar í 93 leikjum.

Sveindís er væntanleg til Íslands á næstunni vegna lokakafla riðlakeppni Þjóðadeildarinnar en Ísland mætir Noregi á útivelli 30. maí og svo Frakklandi í fyrsta leik á endurbættum Laugardalsvelli 3. júní.