Segir löngu kominn tíma á al­menni­legt eftir­lit

Fréttastofu bárust fjölmargar ábendingar um tíuleytið í morgun að fjöldi lögreglubíla væri búinn að staðsetja sig á Suðurlandsvegi austur af höfuðborgarsvæðinu og væri að stöðva vörubíla. Jón S. Ólason er yfirlögregluþjónn á Vesturlandi sem fer fyrir aðgerðunum sem unnar eru í samvinnu við lögregluna á höfuðborgarsvæðinu og Suðurlandi en einnig Vegagerðina og landamæradeild lögreglu.

„Við erum í fyrsta skipti að keyra sameiginlegt eftirlit nokkurra lögregluliða og stofnana með atvinnuflutningum, sem sagt vörubílum, rútum og svoleiðis,“ segir Jón. Á milli tuttugu og þrjátíu lögregluþjónar komi að aðgerðunum.

„Til framtíðar verður þetta enn stærra um sig og meira. Þetta er tilraunaverkefni sem er komið til að vera.“

Hann myndir vonir við að öflugt eftirlitskerfi sé í fæðingu.

„Það þarf að taka á þessum bransa. Það er dálítið af brotum þó vissulega séu flestir með allt í lagi,“ segir Jón og tínir til alvarlegustu brotin.

„Alvarlegustu brotin eru á reglum um akstur og hvíld. Svo eru náttúrulega þungaflutningarnir. Það þarf enginn að velkjast í vafa um það. Við lítum bara í kringum okkur og sjáum að vegakerfið er í klessu. Það þarf að taka á því líka. Þetta er ein af leiðunum en okkar hlutverk er að fylgjast með að farið sé eftir reglum. Að vegakerfið þoli það sem verið er að flytja.“

Þá sé verið að skoða ástand ökutækja og öryggisbúnað. Hingað til hafi eftirlit á vegum landsins falið í sér að einn og einn bíll sé stöðvaður af handahófi. Nú sé planið að haga eftirliti af miklu stærri skala.

„Það er löngu kominn tími á það. Við sóttum okkur þekkingu til nágrannalandana hvernig þeir standa að svona.“

Reyna að stöðva skussana

Lögregluþjónar athuga hvort bílstjórar séu með atvinnuleyfi og landvistarleyfi; hvort þeir megi vera hér á landi og sinna atvinnu. Til framtíðar reiknar Jón með því að Skatturinn, Tollurinn og Matvælastofnun taki þátt í aðgerðunum.

„Við erum að vinna eftir markmiðum sem eru sett af Evrópusambandinu og ef maður skoðar þau þá eiga þau fullkomlega rétt á sér. Það er annars vegar umferðaröryggi og ekki síður samkeppnisstaða í atvinnuflutningum. Það er dýrara að vera með hlutina í góðu lagi heldur en að vera skussinn sem er að spara sér peninga, og getur þá jafnvel undirboðið þann sem er með allt í lagi. Það er líka verið að vinna gegn svona starfsemi.“

Borið hefur á því að aðilar í ferðaþjónustu kvarti yfir því að erlendir aðilar komi hingað til land leyfislausir og aki rútum og langferðabílum um landið. Jón segir það hluta af eftirlitinu.

„Það er inni í þessum pakka. Þetta er stór pakki.“

Hann segir bílstjóra almennt hafa tekið vel í aðgerðirnar í góða veðrinu.

Ólík viðbrögð bílstjóra

Fréttastofa ræddi við tvo vörubílstjóra sem biðu eftir því að farartæki þeirra yrðu tekin til skoðunar.

Aðalbjörn Guðmundur Sverrisson vörubílstjóri tók eftirliti lögreglu af stökustu ró. Hann fagnar eftirliti lögreglu svo framarlega sem það taki ekki of mikinn tíma.

Sigurður Már Sigþórsson var ekki sáttur við framkvæmd eftirlits lögreglu á Suðurlandsvegi og telur hana ekki lögum samkvæmt.