Þróttur skoraði sex og flaug á­fram

Heimakonur byrjuðu af gríðarlegum krafti og kom Þórdís Elva Ágústsdóttir þeim yfir strax á 6. mínútu. Sú átti eftir að láta að sér kveða. Þórdís Elva bætti við öðru marki sínu á 23. mínútu og fullkomnaði þrennuna á 35. mínútu, staðan 3-0 í hálfleik.

Ef Víkingar gerðu sér vonir um endurkomu eftir hálfleiksræðuna þá var slökkt á þeirri von í upphafi síðari hálfleiks þegar Brynja Rán Knudsen skoraði fjórða mark Þróttar. Bergdís Sveinsdóttir klóraði í bakkann áður en Unnur Dóra Bergsdóttir bætti við fimmta marki Þróttar.

Dagný Rún Pétursdóttir minnkaði muninn í 5-2 og Sigríður Theód. Guðmundsdóttir bætti við sjötta marki heimaliðsins þegar enn voru 25 mínútur til leiksloka. Fleiri urðu mörkin þó ekki og lokatölur í Laugardal 6-2 Þrótti í vil sem er komið í 8-liða úrslit Mjólkurbikarsins.