Mögu­legt að hitinn fari í tuttugu stig í fyrsta sinn í ár

Þetta kemur fram á vef Veðurstofunnar. Þar segir að í norðaustantil verði áfram þurrt og þar verði líka hlýtt. Möguleiki sé á að fyrstu tuttugu stig ársins mælist þar í dag í hlýjum sunnan vindi og björtu veðri.

„Á morgun er útlit fyrir sunnan kalda eða stinningskalda og rigningu með köflum, en áfram þurrt norðaustantil á landinu. Hitinn þokast niðurávið og verður á bilinu 5 til 14 stig á morgun, hlýjast á Austurlandi.

Aðfaranótt föstudags gera spár ráð fyrir að berist kaldur loftmassi yfir landið úr vestri, ættaður frá heimskautasvæðum Kanada. Þá snýst í suðvestan stinningskalda eða allhvassan vind með skúra- eða éljahryðjum nokkuð víða, en áfram nær úrkoman ekki yfir á norðaustanvert landið. Þetta veðurlag helst síðan væntanlega áfram út föstudaginn.

Á laugardaginn dregur úr vindinum, en áfram má búast við éljum eða skúrum og fremur kalt í veðri, sérílagi miðað við það sem verið hefur undanfarið,“ segir í hugleiðingum veðurfræðings.

Veðurhorfur á landinu næstu daga

Á fimmtudag: Sunnan og suðvestan 8-15 m/s og rigning með köflum, en þurrt norðaustantil á landinu. Hiti 6 til 14 stig, hlýjast á Austurlandi.

Á föstudag: Suðvestan 10-18, skúrir eða él og hiti 2 til 8 stig. Þurrt að kalla norðaustanlands með hita að 12 stigum.

Á laugardag: Vestlæg átt 5-13 og él eða skúrir, en bjartviðri austanlands. Áfram fremur kalt í veðri.

Á sunnudag: Suðvestanátt, skýjað og sums staðar dálítil væta, en léttskýjað norðaustan- og austanlands. Hiti 7 til 13 stig yfir daginn.

Á mánudag og þriðjudag: Suðvestan- og sunnanátt og bjartviðri, en skýjað við vesturströndina. Hlýnandi veður.