Buðu mót­herjum Björg­ólfs fyrst þjónustu sína

Ítarlega hefur verið fjallað um njósnir sem tveir fyrrverandi lögreglumenn stunduðu fyrir hönd Björgólfs Thors árið 2012 eftir að Kveikur sagði fyrst frá þeim í vikunni. Njósnirnar tengdust málsókn á hendur Björgólfi sem þá var í undirbúningi og tengdist Landsbankanum. 

Á meðal þeirra sem njósnað var um var Vilhjálmur Bjarnason sem síðar varð þingmaður Sjálfstæðisflokksins en hann átti frumkvæðið að undirbúningi málsóknarinnar.

Í gögnum sem sáust í umfjöllun Kveiks var meðal annars útprentun á glæru um aðdraganda þess að lögreglumennirnir fyrrverandi hófu störf fyrir Björgólf. Hún virðist stafa frá lögreglumönnunum. Þar stendur að þeir hafi fyrst rætt við lögmenn hjá Landslögum um að afla gagna í komandi dómsmáli gegn Björgólfi.

Samkomulag hefði ekki náðst við Landslög en í framhaldinu hafi þeir haft samband við Birgi Má Ragnarsson, þáverandi framkvæmdastjóra Novators, fjárfestingarfélags sem var að stærstum hluta í eigu Björgólfs. Þeir hefðu svo afhent honum endurgjaldslaust gögn sem þeir teldu nýtast til varnar í málsókninni sem lögmenn Landslaga undirbjuggu á þeim tíma.

Tveir lögmenn hjá Landslögum staðfesta við Vísi að það hafi komið til tals að Pars per Pars (PPP slf.), ráðgjafarfyrirtæki lögreglumannanna, ynni að undirbúningi málsóknarinnar gegn Björgólfi. Niðurstaðan hefði verið að óska ekki eftir þjónustu fyrirtækisins.

Töldu sig miklu betri í að afla gagna sjálfir

Pars per Pars hafði unnið fyrir slitastjórn Milestone sem Grímur Sigurðsson, lögmaður hjá Landslögum, stýrði á sama tíma og þeir unnu í hlutastarfi fyrir embætti sérstaks saksóknara. Þeir unnu skýrslu fyrir slitastjórnina upp úr gögnum sem þrotabúið átti rétt á frá embætti sérstaks saksóknara.

Lögreglumennirnir tveir voru síðar kærðir fyrir brot á þagnarskyldu í starfi þegar þeir létu Grím skiptastjóra fá rannsóknargögn um Milestone. Málið var síðar fellt niður.

Í skjali Pars per Pars sem sást í umfjöllun Kveiks segir að Grímur hafi farið þess á leit við lögreglumennina að þeir beittu „aðferðarfræði“ sinni til þess að afla gagna í dómsmáli gegn Björgólfi, meðal annars með því að taka gögn frá embætti sérstaks saksóknara sem gætu nýst í málsókninni.

Grímur segir að það hafi komið til tals að Pars per Pars tæki að sér svipuð verkefni og það vann fyrir þrotabú Milestone, að safna gögnum og greina þau. Forsenda þess væri að það væru gögn sem aðstandendur málsóknarinnar ættu rétt á að fá aðgang að.

„Ef það á að skilja þessa glæru þannig að ég hafi beðið þá um að gera eitthvað ólöglegt þá er það með öllu rangt,“ segir Grímur við Vísi.

Jóhannes Bjarni Björnsson, lögmaður hjá Landslögum sem stýrði því sem varð síðar hópmálsókn gegn Björgólfi, segir að Landslög hafi ekki falast eftir þjónustu Pars per Pars og ekki talið hana gagnast sér.

„Það snýst bara um að safna saman gögnum sem þeir töldu sig vera einhverja sérfræðinga í en við töldum okkur nú vera miklu betri í sjálfir,“ segir Jóhannes Bjarni.

Málsóknin ekki hafin þegar njósnirnar áttu sér stað

Þegar njósnir Pars per Pars um Vilhjálm Bjarnason áttu sér stað haustið 2012 var eiginleg málsókn fyrrverandi hluthafa í Landsbankanum gegn Björgólfi, stærsta eiganda hans, ekki hafin. Landslög unnu þá fyrir Vilhjálm að svonefndu vitnamáli þar sem krafist var skýrslutaka af hópi manna í kringum Björgólf til undirbúnings málsóknar. 

Í umfjöllun Kveiks kom fram að Björgólfur hefði haft áhuga á að leiða í ljós hverjir stæðu að málsókn gegn honum með Vilhjálmi. Sjálfur hefði hann verið sannfærður um að Róbert Wessmann, fyrrverandi samherji hans og síðar keppinautur, stæði að baki mögulegum málaferlum vegna falls Landsbankans.

Hópmálsókn gegn Björgólfi vegna meintra blekkinga hans í garð hluthafa var síðan þingfest árið 2015. Málinu lauk með sátt sem Björgólfur gerði við fyrrverandi hluthafana þar sem hann gekkst þó ekki við ábyrgð á falli bankans.

Pars per Pars starfaði einnig fyrir slitastjórn Glitnis eftir að lögreglumennirnir tveir hættu störfum hjá sérstökum saksóknara. Eftir að eigendur félagsins voru kærðir fyrir brot á þagnarskyldu kannaði slitastjórnin hvort að þeir hefðu nýtt sér upplýsingar frá embættinu en taldi ekkert benda til þess, samkvæmt umfjöllun mbl.is frá þessum tíma.

Félaginu PPP var slitið haustið 2013, um ári eftir að njósnirnar á vegum Björgólfs áttu sér stað. Fjórum árum síðar var nafni annars ráðgjafarfyrirtækis sem Jón Óttar átti í félagi við Svein Guðmundsson, hæstaréttarlögmann, breytt í PPP slf. Það félag var úrskurðað gjaldþrota í fyrra. Samkvæmt upplýsingum fréttastofu kom Sveinn þó aldrei að starfi ráðgjafafyrirtækisins heldur aðstoðaði Jón Óttar aðeins við að koma því á fót sem greiði vegna þáverandi fjölskyldutengsla.

Fréttin hefur verið uppfærð.