Latabæjarnammið vel þekkt um allan heim

Vörurnar verða framleiddar af Bönunum og seldar í verslunum Hagkaups og Bónus. Grænmeti, ávextir, mjólkurvörur og fleiri tegundir matvæla verða í sérmerktum umbúðum og hugað verður sérstaklega að því að gera íþróttanammið að meira spennandi kosti en sælgæti. Umbúðirnar verða samkvæmt tilkynningu handhægar og innihalda skammta sem henta börnum vel.

Lykilatriði að byrja snemma 

Í tilkynningu um verkefnið kemur fram að fyrirtækin hafi viljað stuðla að heilbrigðu mataræði barna og á sama tíma styðja við nýjar ráðleggingar um mataræði frá embætti landlæknis.

„Það vantar vörur sem stuðla að heilbrigðu mataræði barna. Latibær fór í sambærilegt átak fyrir 30 árum sem skilaði sér í 22 prósenta aukningu í grænmetis- og ávaxtaneyslu barna. Við trúum því að með því að bjóða upp á hollar matvörur á áhugaverðan og skemmtilegan hátt velji börn grænmeti og ávexti oftar,“ segir Magnús Scheving.

Magnús segir algert lykilatriði að byrja snemma að hafa áhrif á heilsu fólks. Mataræði sé stór hluti af því að gera fólk að heilbrigðum einstaklingum. Mataræði fólks hafi breyst mikið síðustu áratugi og algengara sé að fólk borði gjörunninn mat en áður.

„Latibær var stofnaður til að hvetja fólk til að velja hollari kostinn og hvetja til hreyfingar,“ segir hann og að á þeim tíma sem fyrirtækið er stofnað hafi fáir verið að hugsa um þessa hluti.

„Þetta stefndi í óefni.“

Magnús eignaðist í fyrra aftur sjónvarpsþættina ásamt vörumerki og hugverkaréttindum en fyrir tólf árum seldi hann bandaríska sjónvarpsfyrirtækinu Turner þættina og allt hugverk tengt þeim. Magnús sagði í viðtali í fyrra við það tilefni að hann vildi sjá þættina aftur í sjónvarpi, þeir ættu enn erindi við áhorfendur.

Latibær er eitt þekktasta vörumerki Íslands. Þættirnir voru sýndir í um 170 löndum og þýddir á 29 tungumál. Þættirnir fóru þannig inn á um 500 milljón heimili og unnu Bafta-verðlaun og ýmis önnur verðlaun. Þá vann Magnús með Michelle Obama í Hvíta húsinu að því að hvetja fólk til hreyfingar og forseta Síle og konunginum á Spáni.

Þegar Latibær var sem vinsælastur, í kringum aldamótin, var einnig leikrit í Þjóðleikhúsinu og Loftkastalanum. Þá var unnið orkuátak í samráði við stjórnvöld sem snerist um að hvetja börn til að borða meira grænmeti og ávexti.

Landlæknir kynnti nýverið ráðleggingar um mataræði. Þar kom til dæmis fram að borða ætti grænmeti og ávexti með öllum máltíðum. Að minnsta kosti fimm skammta en helst átta.

Nýja Latabæjarnamminu er þannig ætlað að styðja við þessar nýju ráðleggingar. Pétur Smári Sigurgeirsson, sölustjóri Banana, segir að þau hafi viljað bregðast hratt við.

„Við vildum bregðast hratt við nýjum ráðleggingum í mataræði og bjóða barnafjölskyldum upp á hollar vörur á skemmtilegan hátt,“ segir hann. „Ábyrgðin á matvælaframleiðendum og smásölum á vöruúrvali verslana er mikil og við skorumst ekki undan því,“ segir Pétur Smári.

Magnús segist eftir kynningu Landlæknis hafa haft samband við verslanir til að athuga hvort þær væru til í samstarf. Það hafi allir tekið vel í þá sem hann hafði samband við og skilið að þetta væri þjóðfélagslega mikilvægt.

„Við erum búin að vera að vinna í þessu og ætlum að kynna þetta 30. apríl um allt land. Við erum að búa til ávexti og grænmeti og það hefur í Latabæ alltaf verið kallað ávaxtanammi. Þetta er vörumerki um allan heim. Ef þú spyrð einhvern í Mexíkó, Bretlandi eða Ástralíu hvað „sports candy“ er þá eru líklega 70 prósent sem geta svarað því.“

Hann segist reglulega hitta fólk sem nú er á barneignaraldri sem segi honum hversu mikil áhrif þættirnir höfðu á þau og þeirra mataræði og hreyfingu.

„Við ætlum að svara þessu kalli og setja íþróttanammi, ávexti og grænmeti, í þessar búðir á góðum kjörum, að hafa aðgengi gott og bæta upplifunina fyrir börn. Að hvetja þau til að sleppa namminu í nammibarnum og fá sér frekar íþróttanammi.“

Matur sem krakkar vilja og geta eldað sjálf

Þá segir hann það líka sorglegt hversu lítið úrvalið er af hollum mat sem er hannaður fyrir börn. Því ætli þau að gera matarlínu og holla rétti sem eru hannaðir fyrir börn.

„Það verður einhvers konar matarlína sem foreldrar geta keypt og kannski eitthvað sem krakkar geta eldað sjálfir þegar þeir verða eldri.“

Íþróttanammið verða ekki endilega skornir ávextir þótt Magnús segi það koma til greina síðar. Markmiðið sé að hafa ávextina og grænmetið í augnhæð barnanna í verslunum þannig þau geti sjálf sett í poka.

„Þannig krakkarnir upplifi að þau séu að gera þetta sjálf.“

Magnús biðlar til foreldra að huga að þessu, að velja hollari kostinn.

„Maður nennir oft ekki að skera ávextina niður en það er svo mikill munur. Um leið og þú skerð þá niður þá borða krakkarnir þá miklu meira en hitt. Það er svo gott að byrja snemma. Það er oft sagt að börn þurfi að smakka sjö sinnum til að finnast eitthvað gott. Fólk ætti því ekki að gefast upp eftir fyrsta skipið.“

Borðar sjálfur meira grænmeti

Sjálfur á Magnús fjögur börn og segir ávexti og grænmeti alltaf hafa verið stóran part í matarræði barnanna.

„Ég á einn tveggja og hálfs árs og hann er að borða miklu meira grænmeti en öll mín börn. Ég veit ekki almennilega af hverju það er. Ég gæti ekki eignað mér það alveg en hann borðar ótrúlega mikið af grænmeti. Grænmetisneysla mín hefur meira að segja aukist,“ segir Magnús.

Hann segir þær kynslóðir sem eru að alast upp og komast á barneignaraldur séu miklu meðvitaðri um hollt mataræði en fyrri kynslóðir en það þurfi að auka aðgengi að hollum mat.

„Ég held það skipti máli hvernig fullorðið fólk talar um ávexti og grænmeti heima hjá sér. Að það sé spennandi. Að það sé gaman að skera niður og skemmtilegt. Þetta held ég að sé mikilvægt.“