Kvikmyndaskóli Ís­lands er gjald­þrota

Í póstinum biðst Hlín afsökunar fyrir hönd skólans á þeim töfum sem orðið hafa á launagreiðslum til starfsfólks. Ástæðan sé sú að rekstrarfélag skólans sé farið í gjaldþrotameðferð.

„Þetta er áfall fyrir okkur öll og fram til dagsins í gær trúðum við sem að skólanum stöndum ekki að til þessa myndi koma. Enda hafa vikum og mánuðum saman verið í gangi umræður milli Kvikmyndaskóla Íslands, háskóla-, iðnaðar- og nýsköpunarráðuneytis (HVIN) og mennta- og barnamálaráðuneytis (MRN) um yfirfærslu málefna skólans úr MRN yfir í HVIN. Síðustu fréttir af því máli bárust frá HVIN ráðuneyti um að þar væri ríkur vilji fyrir því að finna leið til þessarar yfirfærslu,“ segir Hlín.

„Við vinnum heilshugar að af því verði og leggjum okkur fram um að halda starfseminni gangandi og tryggja hagsmuni starfsfólks, kennara og nemenda. Við skiljum afar vel að þetta setur ykkur í erfiða stöðu en ef þess er nokkur kostur fyrir ykkur vonum við að þið gefið okkur tíma til að greiða úr málum.“

Í framhaldspósti til starfsfólks og kennara segir Hlín mikilvæga fundi fram undan í dag á milli skólans og ráðuneyta.

„Framhaldið mun ráðast á þessum fundum. Ég vænti þess að geta tilkynnt undir lok dags hvaða línur hafa verið lagðar, en allt kapp er á að ljúka misserinu í það minnsta og að gæta að nemendum, kennurum og starfsfólki. Eins og staðan er í dag leggjum við allt kapp á að halda starfseminni gangandi.“

Byrjuðu við Vatnsstíg 1992

Saga skólans er rakin á vef hans og endurbirt hér að neðan. Þar segir að fyrstu námskeiðin undir nafni Kvikmyndaskóla Íslands hafi verið haldin haustið 1992 í húsakynnum MÍR félagsins að Vatnsstíg 10. Nemendur voru 23 og kennarar og fyrirlesarar 17, þar af margir af helstu kvikmyndagerðarmönnum landsins. Námskeiðin stóðu yfir í 3 mánuði og lauk með framleiðslu tveggja leikinna stuttmynda. Stofnandi skólans var Böðvar Bjarki Pétursson kvikmyndagerðarmaður. Á þessum fyrstu námskeiðum voru ýmsir sem síðar hafa orðið virkir í kvikmyndaiðnaðinum.

Á árabilinu 1992 til 2000 voru haldin margvísleg námskeið á vegum skólans sem flest höfðu það að markmiði að undirbúa ungmenni til frekara náms eða starfa í kvikmynda- og sjónvarpsiðnaðinum. Megináherslan var lögð á mjög umfangsmikil námskeið sem stóðu yfir í eina önn. Á sumrin voru síðan skemmri námskeið af ýmsu tagi. Árið 2000 var tekin ákvörðun um að efla rekstur Kvikmyndaskóla Íslands og að fella starfsemi hans að hinu almenna skólakerfi í landinu. Í samvinnu við fjölda sérfræðinga var hafist handa við hönnun nýrrar námskrár. Jafnframt var haldið áfram að kenna einnar annar nám, en nú með breyttu sniði, þannig að námið var í raun fyrsta önnin í væntanlegu tveggja ára námi.

Fyrsta námskrá skólans var síðan send Mennta- og menningarmálaráðuneytinu síðla árs 2002. Haustið 2003 veitti Tómas Ingi Olrich, þáverandi Mennta- og menningarmálaráðherra, skólanum svo formlega viðurkenningu ráðuneytisins á tveggja ára námsbraut í kvikmyndagerð á framhaldsskólastigi. Með því var stigið fyrsta skrefið í því að Kvikmyndaskóli Íslands yrði viðurkenndur og formlegur skóli í íslensku menntakerfi.

Margvísleg verkefni með sjónvarpsstöðvunum

Áfram var unnið að þróun námskrár og haustið 2004 var kynnt að þrjár nýjar brautir væru í undirbúningi og árið 2005 var svo lögð inn til Mennta- og menningarmálaráðuneytis námskrá að þremur nýjum brautum við skólann. Þar var mörkuð sú stefna að bjóða upp á nám á sérhæfðum sviðum eins og tíðkast við flesta af betri kvikmyndaskólum erlendis. Tveimur árum síðar veitti Þorgerður Katrín Gunnarsdóttir, þáverandi Mennta- og menningarmálaráðherra, Kvikmyndaskólanum viðurkenningu á þremur nýjum sérsviðum eftir margvíslegt þróunarstarf. Árið 2009 framlengdi Katrín Jakobsdóttir menntamálaráðherra viðurkenningu á fjórum brautum skólans.

Kvikmyndaskólinn hefur allt frá upphafi starfað í nánum tengslum við hagsmunasamtök kvikmyndagerðarmanna og við starfandi framleiðslufyrirtæki og sjónvarpsstöðvar. Unnin hafa verið margvísleg verkefni í samvinnu við sjónvarpsstöðvarnar. Þá hafa á vegum Kvikmyndaskólans verið haldin fjölmörg námskeið í samvinnu við aðra skóla á öllum skólastigum.

Kvikmyndaskólinn starfaði í upphafi sem hluti af öðru félagi en árið 1998 var stofnað um hann sérstakt félag, Kvikmyndaskóli Íslands ehf, í helmingseigu Böðvars Bjarka og Ingu Bjarkar Sólnes. Böðvar Bjarki keypti síðan hlut Ingu Bjarkar. Árið 2000 keyptu samtök rafiðnaðarmanna 50% hlut í skólanum og markmiðið var að fella það að þeirra skólakerfi sem var mjög öflugt á þeim tíma. Vegna áfalla sem rafiðnaðarmenn urðu fyrir í sínum rekstri, sem varð til þess að þeir lokuðu eða lögðu niður alla sína skóla nema einn, þá var rekstur Kvikmyndaskólans endurskipulagður. 

Stofnað var eignarhaldsfélagið Telemakkus ehf, sem er að mestu í eigu Böðvars Bjarka Péturssonar og fjölskyldu hans, og tók það yfir reksturinn og endurskipulagði hann. Skólinn hlaut margvíslegan stuðning frá kvikmyndafyrirtækjum sem hafi reynst mjög mikilvægur á viðkvæmu uppbyggingarskeiði.

Fjöldi reynslumikilla leiðbeinenda

Gæfa skólans hefur frá upphafi verið að kvikmyndagerðarmenn og kennarar hafa verið fúsir að starfa við skólann. Á annað hundrað leiðbeinenda og fyrirlesara hefur starfað við skólann, bæði innlendir og erlendir. Flestir þeirra eru starfandi í greininni. Skólinn hefur útskrifað á sjötta hundrað nemenda af ýmsum námskeiðum skólans. Útskrifaðir nemendur starfa nú víðsvegar í íslenskum kvikmynda- og sjónvarpsiðnaði og hafa haft þar margvísleg áhrif.

Mikill hreyfanleiki hefur einkennt starfsmenn skólans enda er það í eðli rekstrarins. Stjórnendur, kennarar og leiðbeinendur eru starfandi kvikmyndagerðarmenn sem taka tímabundið að sér störf við skólann á milli verkefna. Á meðal þeirra sem gengt hafa skólameistarastöðu í skólanum eru Guðmundur Bjartmarsson, Kristín Jóhannesdóttir, Ásdís Thoroddsen og Hilmar Oddsson.

Skólinn hefur staðið fyrir og tekið þátt í ýmsum námskeiðum og samvinnuverkefnum í gegnum árin. Má þar nefna: Símenntunarnámskeið í samvinnu við sjónvarpsstöðvarnar, þátttöku í ýmsum verkefnum í samvinnu við Nýsköpunarsjóð námsmanna, margvísleg verkefni í samvinnu við Skjá 1, námskeið um notkun myndmiðla í kennslu í samvinnu við Kennarasambandið, námskeið í fréttavinnslu í samvinnu við nemendur í Hagnýtri fjölmiðlun hjá Háskóla Íslands, framleiðsla heimildamyndar um skapandi starf í leikskóla í samvinnu við Leikskólann Sæborg, rekstur leiklistarskóla fyrir börn og unglinga í samvinnu við Borgarleikhúsið, sumarnámskeið í kvikmyndagerð í samvinnu við Stöð 2 og Kvikmyndasjóð, framleiðslu á sex leiknum sjónvarpsmyndum (RRX 3. reglan) í samvinnu við RÚV, námskeið í kvikmyndagerð í samvinnu við Hitt húsið, framleiðslu heimildamyndar um Elliðaárdalinn í samvinnu við 5 grunnskóla og Orkuveituna, námskeið í sjónrænni miðlun í samvinnu við Sagnfræðiskor Háskóla Íslands, handritanámskeið í samvinnu við Leikskáldafélagið og Kvikmyndasjóð, námskeið í stuttmyndagerð í samvinnu við Verzlunarskólann, námskeið í gerð heimildaþátta fyrir útvarp í samvinnu við Háskólann á Grænlandi, Kvikmyndaskólann i Svíþjóð (DI) og danska ríkisútvarpið (DR) með stuðningi Leonardo áætlunar Evrópusambandsins.

Á háskólastig

Árið 2008 var ákveðið að taka þá stefnu að færa skólastarf Kvikmyndaskóla Íslands á háskólastig og var kennsluskrá skólans löguð að því skólastigi. Jafnframt var hafinn undirbúningur að stofnun alþjóðlegrar deildar við skólann. Árið 2012 var skólinn tekinn inn sem fullgildur meðlimur inn í Cilect, alþjóðasamtök samtök 180 fremstu kvikmyndaskóla heimsins. Hvert ár keppa skólarnir sín á milli og senda sínar bestu stuttmyndir til keppni. Kvikmyndaskólinn hefur tekið þátt í þessari keppni frá árinu 2013 og hefur þrívegis verið í topp 20, en meðalárangur skólans er 49. sæti.

Meðal fagfólks sem hefur kennt þessa önnina eru hámenntaðir og reyndir aðilar úr leiklistar- og kvikmyndabransa Íslands: Arna Magnea Danks, Kristófer Dignus, Ólafur DeFleur, Erlingur Óttar Thoroddsen, Baldvin Z, Hilmar Oddsson, Guðmundur Ingi Þorvaldsson, Gunnar Björn Guðmundsson, Þórunn Erna Clausen. Rúnar Guðbrandsson, Þorsteinn Bachmann og Ólöf Birna Torfasdóttir.

Fréttin hefur verið uppfærð.