Tekur hatt sinn ofan fyrir Söndru sem kveður

Metzingen greinir frá því á miðlum sínum að Sandra muni kveðja í sumar, eftir þrjár leiktíðir hjá félaginu síðan hún kom frá Álaborg.

Á þessum tíma eignaðist hún, ásamt handboltamanninum Daníel Þór Ingasyni, sitt fyrsta barn en sneri aftur á handboltavöllinn aðeins þremur mánuðum síðar, í september í fyrra.

„Ég get ekki annað en tekið hatt minn ofan fyrir Söndru vegna þess hvernig hún sneri aftur eftir sína meðgöngu,“ sagði Miriam Hirsch, þjálfari Metzingen. Sandra var valin handknattleikskona ársins á Íslandi 2022 og 2023 en missti svo af stórum hluta síðasta árs vegna meðgöngunnar, eftir að hafa komist að því að hún væri ólétt rétt fyrir HM í lok árs 2023.

„Hún er afskaplega fjörugur leikmaður sem hefur verið að bæta frammistöðu sína að nýju síðustu vikur. Ég skil hins vegar að aðstæður hennar séu ekki auðveldar fyrir hana,“ sagði Hirsch og óskaði Söndru og Verenu Osswald, sem einnig kveður í sumar, alls hins besta í framtíðinni. Þarna færu tvær afar góðhjartaðar manneskjur sem sárt yrði saknað.

„Eftir þrjú ógleymanleg ár með TUSSIES er kominn tími til þess að ég prófi nýja hluti. Þetta var frábær og einstakur tími fyrir mig, því hérna eignaðist ég mitt fyrsta barn. Ég mun aldrei gleyma tíma mínum í Metzingen,“ sagði Sandra.

Óvíst er hvað tekur við hjá Söndru en samkvæmt handbolta.is gæti verið að þau Daníel snúi heim til Íslands og hafa þau verið orðuð við bæði Val og ÍBV.