Lada Sport okkar tíma

„Dacia Duster eru þeir bílar sem allir Íslendingar sjá en eiginlega enginn Íslendingur á því bíllinn er þekktur fyrir að vera undirstaða Íslenska bílaleiguflotans og eitt helsta kennileiti Íslenskrar ferðaþjónustu á þjóðvegum landsins. Það er samt ákveðin synd að eingöngu túristar fái að njóta þess litla grjótharða jepplings. Betra gildi fyrir aurinn er vandfundið þegar litið er til þess hvað fólk getur fengið fyrir peninginn þegar kemur að því að kaupa nýjan og afskaplega hagkvæman bíl,“ segir James Einar.

Dacia Duster Extreme kemur á 18” álfelgum og er klæddur að hluta með Micro Cloud efni sem ver helstu grjótkastfleti bílsins. Micro Cloud er í raun bara mjög fínt nafn á plasti sem er 20% endurunnið. Bíllinn er beinskiptur og kemur með fimm mismunandi aksturstillingum fyrir mismunandi akstursskilyrði. Veghæð bílsins er rúmlega 20 cm sem kemur sér vel ef fólk vill reyna fyrir sér í léttum utan vegar akstri.

„Ef nýi Dusterinn er borinn saman við forvera sinn, þá lítur út fyrir að bíllinn sé búinn að fara í ræktina. Hann hefur bætt á sig heilmiklu kjöti og gerir það að verkum að hann er orðinn ansi myndarlegur.“

Bíllinn kemur með þriggja sílindra, 1.2 lítra mildri tengiltvinn bensín vél. Þó svo að bíllinn sé tengiltvinn þá er ekki hægt að keyra hann á rafmagninu einu og sér. Bíllinn er með litlum rafmagnsmótor sem gefur honum aðeins meiri snerpu og gerir hann hagkvæmari í rekstri. Þar af leiðandi skilar bíllinn 130 hestöflum og 230 Nm af togi.

„Bíllinn verður seint kallaður kraftmikill, en manni finnst hann aldrei vera vélarvana,“ segir James. „Til dæmis ef það þarf að taka fram úr stórum vörubíl þá finnst manni ekki eins að maður sé að leggja líf sitt að veði við að komast fram úr. Bíllinn hefur alltaf mátulegan kraft til að gefa.“

Þar sem að bíllinn finnur sig á flottum stað í verðskala nýrra bíla þá kemur hann ekki með lúxus eins og rafdrifnum skotthlera eða sætum. Engu að síður kemur hann með hita í stýri og framsætum. Hann kemur með 10” skjá og glænýju afþreyingarkerfi sem lætur kerfið í gamla Dacia Dusternum minna á stýrikerfi í Nokia 5110. Einnig er mögulegt að tengja Apple CarPlay og Android Auto við afþreyingarkerfi bílsins.

 Hönnunin á innréttingu bílsins er virkilega góð og fer vel með augað. Það ber þó að nefna að maður finnur ágætis magn af “ódýru” plasti í ökumannsrými bílsins segir James. „Það er þó allt fyrirgefið um leið og hendurnar eru settar á stýrið. Það er massíft og virkilega gott viðkomu sem er mikilvægt þar sem að stýrið er sá snerti flötur sem fær mesta notkun.“

Dacia Duster er eiginlega Lada Sport okkar tíma. Lada Sport var lítill jepplingur sem komst allt, og gátu flestir keypt nýja Lödu Sport án þess að fórna fyrir það handlegg. Þetta á líka við um þennan nýja Dacia Duster og það gerir hann að einum hagkvæmasta bíl sem hægt er að kaupa nýjan úr umboði.

Bíllinn er algjörlega laus við alla tilgerð, og gerir nákvæmlega það sem innihalds lýsinginn segir. Á næstu mánuðum munum við sennilega sjá mjög mikið af þessum bílum á götum landsins og munu bílaleigurnar sennilega ver einn helsti markhópurinn fyrir nýja Dusterinn segir James..

„Almenningur gæti samt gert margt vitlausara en það að íhuga kaup þessum ágæta jeppling. Því að fyrir tæplega 6.4 milljónir eignast fólk afbragðs ökutæki sem getur gert allt í hinu almenna umhverfi venjulegs Íslendings.“

Horfa má á þáttinn í spilaranum hér fyrir neðan: